Sápmi |

Čeavetjávrri geainnu heajumus gaska Suprus Čeavetjávrái divvojuvvo boahtte geasi – ulbmilin govddidit geainnu ja njulget mohkiid

Geaidnobarggut galget gárvánit čakčat 2021.

Sevettijärventie 21.10.2020
Geainnu nummir 92 Supru ja Čeavetjávrri gaskkas divvugohtet geassit 2021 ja bargu galggašii gárvánit čakčat. Geainnu divvot viđa miljon euroin. Govva: Kaisa Aikio / Yle

Geainnu Supru ja Čeavetjávrri gaskkas divvugohtet geassit 2021. Lappi EBI-guovddáš ja johtolatdoaimmahat Väylävirasto muitaledje áššis maŋŋebárgga 20.10. mediadilálašvuođas.

Lappi EBI-guovddáža ovttadaga hoavda Olli Mourujärvi mielde geainnu divodeapmi álggahuvvo konkrehtalaččat boahtte geasi.

Geainnu divvot viđa miljon euroin. Supru ja Čeavetjávrri gaskkas divvojuvvo sullii logi kilomehtera guhkkosaš gaska, danin go ruhtadeapmi ii reahkká divvut olles 120 kilomehter mátkki Gápmasis Njávdámii, muitala Mourujärvi.

– Heajumus gaska Suprus Čeavetjávrái divvojuvvo. Ulbmilin lea govddidit geainnu ja njulget mohkiid. Norgga bealde divodit Njávdáma gili ja ráji gaskasaš oasi geainnus.

Geaidnobarggut galget gárvánit čakčat 2021.

Ruhtadeapmi geainnu divvumii lea ohccojuvvon Kolarctic CBC-prográmmas. Ruhtadeami váldoohccin leat Norgga geaidnolágádus (n. Statens vegvesen) ja earret eará Lappi EBI-guovddáš.

– Lappi EBI-guovddáš lea dás mielde ovttasbargoguoibmin. Mii leat plánen diimmážis ja dál leat dahkan huksenplána geainnu buorideapmái. Čuovvovažžan dál čakčat čađahuvvo huksenmuttu fálaldatgilvu. Huksenbargguid lea ulbmil álggahit boahtte geasi, muitala Mourujärvi.

Mourujärvi árvala, ahte koronadilli ii váikkut plánen- ja huksenbargguide.

– Prošeakta boahtá ollašuvvat koronadilis fuolakeahttá.

Čeavetjávrri geainnu divvugohtet boahtte gease. Lappi EBI-guovddáža ottadaga hoavda Olli Mourujärvi muitala, ahte geainnu nummir 92 Supru ja Čeavetjávrri gaskkas divvugohtet geassit 2021 ja bargu galggašii gárvánit čakčat. Geainnu divvot viđa miljon euroin. Jietna: Erkki Gauriloff / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä