Sápmi |

Čeavrris herskostalai luosain Ohcejogas – Liŋka videoi gávdno dás

Ohcejohkalaš Vuokko Hirvonen oinnii vuosttas geardde hárvenaš ealli boradeamen Ohcejoga jieŋa alde.

Saukot Kemijoen jäällä
Dat čeavrát leat govvejuvvon Giemajogas, Roavvenjárggas. Govva: Marko Junttila

Ohcejohkalaš Vuokko Hirvonen beasai isidiinnes vásihit erenomáš dáhpáhusa, go deaivvaiga oaidnit čeavrá Ohcejogas. Sudno viessu lea Ohcejot gáttis nappo soai oaidniba olles áigge lássaráiggis, mii olgun dáhpáhuvvá.

– Isit lei dás ruovttus ja muhtin bláđđevuovdi riŋgii sutnje ja son geahččagođii olggos, ja de oinnii jieŋa alde man nu. Son gáttii vuos, ahte dat leat gáranasat boradeamen, ja de fuobmái ahte dat lea muhtin eará. De son dadjá vel dan vuovdái, ahte son ii dál astta háleštit, son ferte dutkat mii doppe jieŋa alde lea, muitala Hirvonen.

– De son giikii ja oinnii doppe lea issoras luossa ja muhtin ealli, mii fievrrida dan jieŋa alde. De moai álggiime dan geahččat ja fuobmáime dat lea čeavrris, mii gaiku suttis luosa jieŋa ala. Ja dat luossa bánccardii dies jieŋa alde ja čeavrris doalai dan bastilis bániiguin, ja čeavráshan lea vel nana ollolat.

Vuokko HIrvonen
Vuokko Hirvonen oinnii vuosttas geardde eallimistis čeavrá. Govva: Susanna Guttorm / Yle

Hirvonen isidiinnes lei dieđusge sáhkki ja soai háliideigga oaidnit buorebut. Čeavrris goittotge buokčalii jieŋa vuollai, ja guđii goadjima jieŋa ala. Vuokko Hirvonen goittotge njágai vel ođđasit gáddái geahččat dan ipmaša.

– Dat ii dihton šat, muhto jurddašin mun, ahte manan ođđasit geahččat, ja go lei gollan varra diibmu dan vuosttas dáhpáhusas, go mun oidnen sutti rávddas dákkár čáhppes jorba diŋgga, ja jurddašin leigo diet dat čeavrris, ja de dat buokčalii, ja iđii fas eará sadjái, ja de mun oidnen dat lei čeavrris.

– Doppe dat borai smávit guliid, ja mun de jurddašin, mun viehkalan dohko vuollelii, jus dat máhccá dohko dan stuorit luosa lusa, ja nu dat de máhccái dohko, ja mun ledjen doppe vieltti ravddas vuordimen.

Čeavrát leat hárvenaččat Suomas

Čeavrát leat ráfaidahtton eallit Suomas. Riistakolmiot.fi mielde dát eallit eai leat go dušše sullii moadde duhát olles Suomas.

Vuokko Hirvonenge ii leat goassige ovdal oaidnán čeavrá, vaikko láve geahčadit juohke beaivve lássaráigge olggos ja čuovvut, mii luonddus dáhpáhuvvá.

– Dat lei hui imáš, in leat goassege oaidnán čeavrá ja vel dat, ahte mo dat sáhtii goddit nu stuorra dálveluosa.

– Lei lihkku, go deaivvaime justa dalle oaidnit dan čeavrá, go dat lei goddán dan luosa ja fidnen dan dasa jieŋa ala. Orui, ahte dat luossa girdila go dat vuosttilda dan čeavrá, imaštallá Hirvonen.

Geahča video Facebookkas.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä