Sápmi |

Christina Henriksen jođihišgoahtá Sámiráđi

Henriksen bargá Sámiráđi presideantan boahtte Sámekonferánssa rádjai, mii lágiduvvo jagis 2021.

Sámiráđđi Åsa Larsson Blind ja Christina Henriksen
Åsa Larsson Blind geigii jođiheaddjišluppoha Christina Henriksenii. Govva: Sámiráđđi / Saamelaisneuvosto

Christina Henriksen lea válljejuvvon Sámiráđi ođđa presideantan. Henriksen váldá doaimma badjelasas Åsa Larsson Blindis, guhte lea jođihan Sámiráđi jagi 2017 rájes.

– Munnje lea stuorra gudni, go Sámiráđđi lea válljen mu jođihit Sámiráđi boahtte Sámekonferánssa rádjai, mii lea jagis 2021. Vuollegašvuođain válddán badjelasan barggu. Åsa ja dat ovddeš presideanttat leat bargan issoras buori barggu organisašuvnna jođihemiin ja huksemiin ovdal mu, dadjá Henriksen.

Henriksen lea Girkonjárggas eret ja lea guhká bargan iešguđet Sámi organisašuvnnain. Jagi 2018 rájes son lea doaibman Sámiráđi várrepresideantan ja bargolávdegotti lahttun. Bargolávdegottis čohkkájit dál Henriksen, Åsa Larsson Blind, Áslat Holmberg ja Ivan Matrehkin.

Henriksenis lea viiddis hárjáneapmi sámepolitihkalaš bargguin, earret eará sisabahkken-, vuoigatvuođaáššiin ja kultursuorggis. Son lea maid guhká bargan riikkaidgaskasaš dásis ja erenoamážit Ruošša beale álgoálbmogiiguin.

– Mun illudan ovttasbargagoahtit min miellahttoservviiguin ja ovddidit sámi vuoigatvuođaid ja álgoálbmotvuoigatvuođaid, sihke dáppe Sámis ja maiddái riikkaidgaskasaččat, dadjá Christina Henriksen.

Sámiráđđi lea sápmelaččaid oktasaš sorjjasmeahttun kulturpolitihkalaš ja politihkalaš ásahus, mii doaibmá Norgga, Ruoŧa, Ruošša ja Suoma sámiid organisašuvnnaid oktasašbargoorgánan. Sámiráđi váldoulbmil lea ovddidit sámiid vuoigatvuođaid ja beroštumiid. Sámiráđđi lea vuođđuduvvon jagis 1956.

Varrasamosat: Sápmi

Váldoođđasat

Varrasamosat

Muualla Yle.fi:ssä