Sápmi |

Čielggadeapmi boazodoalu heahtedilis gárvánan, ministeriijas jáhkket raportta almmustuvvat lagaš beivviid áigge

Luondduriggodatguovddáža gárven raporta vássán dálvvi muohtadilis ja dan váikkuhusain boazodoallui lea doaimmahuvvon Eanan- ja meahccedoalloministeriijai.

Tapani Sirviö
Eanan- ja meahccedoalloministeriija ráđđádalli virgeolmmoš Tapani Sirviö jáhkká, ahte raporta almmustuvvá lagaš beivviid áigge. Govva: Vesa Toppari / Yle

Bohccuid guohtuma heahtedili čielggadeapmi lea gárvánan.

Luondduriggodatguovddáš Luke lea doaimmahan čielggadeami eanan- ja meahccedoalloministeriijai, muhto vel ii leat sihkkar, makkár áigetávvaliin raporta almmustuvvá.

Eanan- ja meahccedoalloministeriija ráđđádalli virgeolmmoš Tapani Sirviö muitala, ahte ministeriijas eai leat gávnnahan makkárge eastagiid raporta almmustuvvamii, muhto raporta lea vel Luke dárkkistusas. Sirviö jáhkká raportta almmustuvvat lagamuš beivviid áigge.

– Moai letne mánnodaga háleštan Luke kollegain, ja Lukes galget vel juridihkalaččat dárkkistit muhtin čuoggáid bálggusguovdasaš ruhtadoalu loguid oasil. Dasto go dat lea čielggas, nu gáttán dat lea aivve lagaš beivviid ášši, ahte raporta almmustahtto.

Raporta almmustuvvá Luondduriggodatguovddáš Luke raportaráiddus.

Bálgosiid ovttastus bivddii guovvamánus ministeriija čielggadit, leago vássán dálvvi muohtadilli dakkár, mii dagaha mearkkašahtti váttisvuođaid ja hehttehusaid boazodollui.

Eanan- ja meahccedoalloministeriija mearridii njukčamánus čielggadit bohccuid guohtuma heahtedili ja sirddii ášši viidásit Luondduriggodatguovddáš Lukei. Ministeriija attii Lukei áiggi gárvet čielggadeami 2.8. rádjái.

Dán čielggadeami vuođul stáhtaráđđi mearrida, buhtaditgo muohtadili dagahan vahágiid vai eai.

Varrasamosat: Sápmi

Váldoođđasat

Varrasamosat

Muualla Yle.fi:ssä