Sápmi

Čielggadus: Sámebearrašat eai oaččo doarvái bálvalusaid iežaset eatnigielain

Mánná- ja bearašbálvalusaid nuppástuhttinprográmma (LAPE) dagahan čielggadusa mielde sámegielat bálvalusat eai leat doarvái oažžumis. Čielggadus guorahalai sode-bálvalusaid, vuođđooahpahus-, nuoraidbargo- ja kulturbálvalusaid sihke searvegottiid fállan doaimmaid.

Saamenkieliset palvelut kartoitus
Govva: Minna Näkkäläjärvi /Yle

Mánná- ja bearašbálvalusaid nuppástuhttinprográmma (LAPE) dagahan čielggadusa mielde sámemánáid,- nuoraid ja –bearrašiid vuoigatvuohta sámegielat bálvalusaide ollašuvvá heittogit.

Sápmelaččaid ruovttuguovllus dilli lea veháš buoret go ruovttuguovllu olggobealde. Ruovttuguovllusnai gielaid guoskevaš earut leat stuorrát. Buot heajumus dilli lea nuortalašgielagiin.

Čielggadusa mielde sámemánáid ja –bearrašiid vuođđovuoigatvuođaid ja ovttaveardásašvuođa ollašuhttima dihte sámegielat sosiála-, dearvvašvuođa- ja čuvgehanbálvalusaid galgá nannet eandalii sámeguovllu olggobealde. Mánáide ja nuoraide galggašii ordnet sámegielat doaimma, nu nuoraidbarggu, kultuvrra go maiddái lihkadeami dáfus.

"Lea dehálaš ipmirdit sámevehádaga vuoigatvuođaid"

Eandalii sierra bálvalusaid galggašii ovddidit nu, ahte dat vástidit sisdoalu dáfus sápmelaččaid iežaset ipmárdusa ja dárbbu dain bálvalusain.

Sámeservviid rolla ja resurssaid galggašii nannet, daningo servviin lea mearkkašahtti sajádat sámegiela ja kultuvrra bajásdoallamis earenoamážit sámiid ruovttuguovllu olggobealde.

– Mánná- ja bearašbálvalusaid nuppástuhttinprográmma doalvu čielggadusa oassin eanangottiin álgán ođasmahttinbarggu. Lea hui dehálaš, ahte maiddái sámiid ruovttuguovllu olggobealde, sihke gielddain ja boahttevaš eanangottiin, ipmirdit sámevehádaga vuoigatvuođaid eamiálbmogin, muittuha LAPE-stivrenjoavkku ságadoalli Maria Kaisa Aula.

Čielggadusa dagai Sámedikki oktavuođas doaibmi Davvi-Suoma sosiálasuorggi máhttinguovddáža sámeovttadat. Čielggadus guorahalai sosiála- ja dearvvašvuođabálvalusaid, vuođđooahpahus-, nuoraidbargu- ja kulturbálvalusaid sihke searvegottiid fállan doaimmaid.

Kártema sámegielat bálvalusaid dálá dilis gávnnat dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä