Sápmi |

Čievrafitnodaga mielde bohcco baikkat bilidedje betona – fitnodat gáibida bálgosis mealgadis buhtadusaid

Bálggus ii hálit kommenteret dán muttus ášši. Čuohte duhát euro sturrosaš riidoášši gieđahallet gearregiin áramustá boahtte giđa.

Poron papanoita.
Bilidiigo bohcco baika betona ja fertego bálggus buhtadit vahágiid, dan háliidit gearretrievttis čielggadit. Govva: Kaija Länsman / Yle

Gearretriektái boahtán guovtti sierra stevdnenohcamušas Sorakukkola Oy fitnodat gáibida Bátneduoddara bálgosa buhtadit sidjiide goluid, mat leat boahtán billašuvvan betonas.

Riidoášši duogábealde lea čievravuorká lahka Avvila. Čievrafitnodaga mielde Bátneduoddara bálgosa bohccot leat mannan geasi baikán fitnodaga čievrraid ala. Čievrras leat ráhkadan betona, man kvalitehtas olbmot váidaledje fitnodahkii.

Fitnodaga iežas dutkamušain čielggai, ahte bohccuid baikkat leat mielde betonas. Fitnodat divui sin betonas ráhkaduvvon láhttiid ja mávssii buhtadusaid betonas váidalan olbmuide.

Stevdnenohcamušaid mielde fitnodat gáibida bálgosa máksit sidjiide oktiibuot badjel 100 000 euro ovddas buhtadusaid daid betonain, maid sii navdet billašuvvan bohcco baikkaid dihte.

Bálggus ii hálit kommenteret

Stevdnenohcamušain čielgá, ahte bálggus lea máŋggaid gesiid áigge viežžan bohccuid čievravuorkkás eret. Fitnodaga mielde ovdamearkka dihte mannan geasi eai viežžan, vaikko fitnodat bivddii sin dahkat nu.

Bátneduoddara bálggus ii hálit dán muttus kommenteret ášši moge. Vuosttas dieđuid mielde bálggus boahtá vuostálastit buhtadusgáibádusaid. Bálggus lea maiddái ohcan lasi áiggi iežaset vástádusa doaimmaheapmái gearretriektái.

Gearretrievttis eai leat vel mearridan, goas riidoášši gieđahallet. Áramusat váldogieđahallan lea boahtte giđa.

Árvvoštallanlávdegoddi: Bálggus ii leat geatnegahtton buhtadit vahágiid

Riidoášši leat gieđahallan dán giđa goit guktii Anára árvvoštallanlávdegottis. Árvvoštallanlávdegotti mielas bálggus ii leat geatnegahtton buhtadit fitnodahkii goluid. Čievrafitnodat háliida, ahte gearretriekti gomiha dáid mearrádusaid ja geatnegahttá bálgosa máksit sidjiide buhtadusaid.

Lávdegoddi ákkastallá mearrádusa čujuheamin boazodoallolága 31 ja 34 §:ii. Boazodoallolága 31 § mielde sámiguovllus ferte buhtadit dušše vahágiid, maid bohccot dagahit eana- ja vuovdedollui.

Lávdegotti ságadoallin lea dán ášši gieđahallamin doaibman Risto Niemi. Son lea doaibman ovdal sihke eanandoallin, vuovdebargin go maiddái boazodoallin.

– Mii bođiimet dan oaivilii, ahte bálggus ii dárbbaš áidut čievravuorkká, iige buhtadit vahágiid. Sámiid ruoktoguovllus lea eará dilli go máddelabbos, muitala Niemi oanehaččat.

Árvvoštallanlávdegoddi lea boazodoallolágas máinnašuvvon lávdegoddi, man bargun lea čoavdit vahágiid, maid boazodoallu lea dagahan eana- ja vuovdedollui. Lávdegotti ságadoalli mearrida EJB-guovddáš. Oktan lahttun lea dan bálgosa lahttu, gean bálgosa riidu dahje vahátášši guoská. Nubbin lahttun lea báikkálaš eanandoalliid ovddasteaddji.

Jus lea duhtameahttun árvvoštallanlávdegotti mearrádusaide, daidda sáhttá ohcat gomiheami gearretrievttis namalassii stevdnenohcamušain.

Čievrafitnodat ohcan huksenlobi áiduma várás

Anára gieldda teknihkalašlávdegotti beavdegirjjis čielgá, ahte fitnodat lea gieskat ohcan lobi áidut čievravuorkká guovllu nu, ahte bohccot eai šat beasa dohko.

Gielda lea addán lobi dainna eavttuin, ahte vearráhiid ii oaččo lohkkadit, go áiddi sisa báhcet eatnamat, mat eai leat fitnodaga oamastusas.

Varrasamosat: Sápmi

Váldoođđasat

Varrasamosat

Muualla Yle.fi:ssä