Sápmi |

Čievrafitnodaga mielde bohccobaikkat bilidedje betona – gearretriekti hilggui bálgosis gáibiduvvon buhtadusaid

Gearretriekti hilggui visot sivahusaid, iige Bátneduoddara bálggus dárbbaš máksit sis gáibiduvvon 100 000 euro vahátbuhtadusa iige diggegoluid.

Poron papanoita.
Gearretriekti galggai čielggadit, fertego bálggus buhtadit vahágiid, mat šadde go bohccot baike čievrraid ala. Govva: Kaija Länsman / Yle

Bátneduoddara bálggus ii gártta máksit čievrafitnodat Sorakukkola Oy:i buhtadusaid nu mo fitnodat lei gáibidan. Čievrafitnodaga mielas Bátneduoddara bálgosa bohccuid baikkat ledje bilidan betona ja fitnodat gáibidii badjel 100 000 euro buhtadusa áššis.

Lappi gearretriekti attii otne gaskavahku duomu áššis ja das celkojuvvo, ahte áššáskuhttin dahje sivahusat leat hilgojuvvon. Čievrafitnodat galgá máksit Bátneduoddara bálgosa diggegoluid.

Duomu dulkojumis gearretriekti ákkastallá mearrádusas boazodoallolága 31 ja 34 paragráfaiguin. Daid mielde sámeguovllus ii boazodoallu dárbbaš eastit nu gohčoduvvon boazovahágiid ovdamearkka dihte áidumiin šiljuid dahje šaddogárddiid.

Jus bálggus ii leat rihkkon geatnegasvuođaidis, das ii sáhte gáibidit vahátbuhtadusa, ákkastallojuvvo gearretrievtti duomus.

Duomus sáhttá váidit mánotbaji siste Roavenjárgga hoavvariektái.

Olbmot ledje váidalan betona kvalitehtas – fitnodat stevdnii bálgosa

Riidoášši duogábealde lea čievravuorká lahka Avvila. Čievrafitnodaga mielde Bátneduoddara bálgosa bohccot leat geassit 2019 baikán fitnodaga čievrraid ala. Čievrras leat ráhkadan betona, man kvalitehtas olbmot váidaledje fitnodahkii.

Fitnodaga iežas dutkamušain čielggai, ahte bohccuid baikkat leat mielde betonas. Fitnodat divui sin betonas ráhkaduvvon láhttiid ja mávssii buhtadusaid betonas váidalan olbmuide.

Čievrafitnodat lei gáibidan Bátneduoddara bálgosa máksit sidjiide oktiibuot badjel 100 000 euro ovddas buhtadusaid daid betonain, maid sii navdet billašuvvan bohcco baikkaid dihte. Bálggus lei šiitán čievrafitnodaga čuoččuhusaid.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä