Sápmi |

City-Sámit čielggadišgoahtá sápmelaččaid kulturguovddáža vuođđudeami Helssegii

City-Sámit -searvi čielggadišgoahtá sápmelaččaid kulturguovddáža vuođđudeami Helssegii. City-Sámit rs. lea ožžon oahpahus- ja kulturministeriijas stáhta sierradoarjaga sápmelaččaid kulturguovddáža plánemis ja vuođđudeamis šaddan goluide.

City Sámit searvvi sátnejođiheaddji Pentti Pieski
Helssega boahttevaš kulturguovddáš bálvalivčče buot Suoma sámejoavkkuid, davvisápmelaččaid, nuortalaččaid ja anáraččaid, City-Sámit rs sátnejođiheaddji Pentti Pieski muitala.

City-Sámit -searvi čielggadišgoahtá sápmelaččaid kulturguovddáža vuođđudeami Helssegii.

Plánejuvvon kulturguovddáš boađášii leat oaivegávpotguovllu sápmelaččaid deaivvadanbáiki ja doarjjošii guovllu sápmelašvuođa.

Juovlamánus álgá badjelaš jagi guhkkosaš čielggadanprošeakta

Juovlamánus álgá badjelaš jagi guhkkosaš čielggadanprošeakta, man áigge searvi dahká earálágan doaibmamálliid guovddážii ja seammás ohcá ovttasbargoguimmiid. Dán muttus plánain lea, ahte guovddážii ordnejuvvojit sajit sámegielat giellabeassái, ovdaskuvlii ja sámegielat oahpahusjovkui.

– Guovddáš bálvala buot  Suoma sámejoavkkuid, davvisápmelaččaid, nuortalaččaid ja anáraččaid. Giellabeasis mánáide addojuvvo giela lassin nana vuođđu maiddái kultuvrii sápmelaš árabajásgeassima bokte ja guovddáš doarjjošii maiddái eará sohkabuolvvaid deaivvadeami ahkeolbmuide ordnejuvvon beaivedoaimma bokte. Oppalohkái guovddáš addá vejolašvuođaid máŋggalágan doaimmaide, mat dorjot sápmelašvuođa, City-Sámit rs sátnejođiheaddji Pentti Pieski smiehtada.

Oahpahus- ja kulturministeriija doarju čielggadanprošeavtta

City-Sámit -searvvi kulturguovddášplánemis ofelažžan leat doaibmán sámedikki doaibmaplána jagiide 2012-2015 ja stáhtaráđi suoidnemánus 2014 mearridan sámegielaid ealáskahttinprográmma, man oktan doaibmabidjun lea girjejuvvon sápmelaččaid deaivvadanbáikki vuođđudeapmi Helssegii.

City-Sámit rs. lea ožžon oahpahus- ja kulturministeriijas stáhta sierradoarjaga sápmelaččaid kulturguovddáža plánemis ja vuođđudeamis šaddan goluide.

Čielggadanprošeakta juo iešalddes gárgeha oaivegávpotguovllu sápmelaččaid doaibmaeavttuid.

Prošeavtta áigge dahkkojuvvojit investeremat mánáid ja nuoraid doaimmaide, ja maiddái dakkár dáhpáhusaide, mat dorjot giela ja kultuvrra.

– Dáid investeremiid mii dárbbašit jo dál giela- ja kultuvrra ealáskahttima doaimmain, Pieski gávnnaha.

Varrasamosat: Sápmi

Váldoođđasat

Varrasamosat