Sápmi |

Čohčuv almostuveh uđđâ oppâmateriaaleh anarâš- já pajekielân – “Pargoh kale liččii veikkâ mon ennuv, mutâ ruttâ piäjá raajijd”

Čohčuv ovdâmerkkân tavesämikielâ eenikielâ lohheeh peessih kevttiđ uđđâ oppâmateriaalijd.

Hannu Kangasniemi
Hannu Kangasniemi muštâl, et sun ferttee pargostis čokkáđ ennuv tiättur piällást. Govva: Sáárá Seipiharju / Yle

Oppâmateriaaltoimâttâh pargee Hannu Kangasniemi muštâl, ete puoh oppâmateriaal projekteh juátkojeh keessiv-uv já pargo juátkoo pirrâ ive.

Kangasniemi muštâl, ete čohčuv almostuveh uđđâ kirjeh anarâš- já orjâlâškielân.

– Anarâškielân Virkkuuvääri 4 mana teddilmân já máhđulávt orjâlâškielâ eenikielâ 8-luoka materiaal. Te lii taggaar orjâlâškielâ biologia tekstâkirje digihäämist, mii lii jo vaalmâš.

virkkuuvääri digimateriaal
Virkkuuvääri digimateriaaleh.

Nuorttâlâškielân lii meid puátimin uđđâ aabiskirje, mutâ Kangasniemi muštâl, ete tot ij lah vala čohčuv vaalmâš.

Kangasniemi muštâl, ete sij láá meiddei rähtimin ovdâmerkkân orjâlâškielâ eenikielâ materiaalijd luvâttâhhân já paješkoovlân. Meiddei anarâškielâ eenikielâ máttááttâs várás láá puátimin digimateriaaleh.

Kesipargeeh pargeh taan-uv keesi iänáš digimateriaalijguin.

– Mist lii tääl eenâb tiäddu digimateriaalij peln.

Eallima ipmašat -digikirje
Orjâlâškielâ biologia tekstâkirje lii digihäämist.

“Pargoh kale liččii veikkâ mon ennuv, mutâ ruttâ talle piäjá váhá raajijd”

Taan keesi oppâmateriaaltoimâttuvvâst láá kulmâ kesipargee – ohtâ nuorttâlâškielâlâš, ohtâ tavesämikielâlâš já ohtâ anarâškielâlâš.

Hannu Kangasniemi muštâl, ete taan ive iä lah nuuvt maaŋgâ kesipargee ko táválávt.

– Ohtâ suijâ lii tot, et ko oppâvuáváámijd uđâsmitij, te tot tovâttij mijjân tom, ete ruttâ ij orroom piisámin mahten.

Oppâmateriaaláin pargeh taan ive suullân 12 parged, mii lii uáli jo uccáá.

– Pargoh kale liččii veikkâ mon ennuv, mutâ ruttâ lii tot mii talle piäjá váhá raajijd.

Anne Seipiharju
Kesipargee Anne Seipiharju parga digimateriaalijd iänáš káidusin. Govva: Anja Kaarret / Yle Sápmi

Anne Seipiharju lii nube keesi pargoost oppâmateriaaltoimâttuvâst. Suu pargo lii sirdeđ materiaal nettin, nuuvt ete šaddeh digimateriaaleh.

– Mun lam ráhtám digihárjuttâsâid já paddim motomijd kuldâlempittáid, maid mun talle sirdám vâi uáppeeh pyehtih kuldâliđ.

Suu mielâst pargo lii suotâs já sun illood, ko piäsá porgâđ jieijâs syergi pargoid.

Koronatile tiet sun-uv lii porgâm pargoid iänáš pääihist. Sun meid osko, ete pargoost lii iše kielâkevttim tááhust, ko tääl sun piäsá kevttiđ sämikielâ piäiválávt pargostis.

Varrasamosat: Sápmi

Váldoođđasat

Varrasamosat

Muualla Yle.fi:ssä