Sää´mjânnam |

Čõõuč saaʹmi ouddoummuvaal riâššâd koronast huõlǩani – võboršeʹǩǩpiijjmõš poott sueʹvet

Saaʹmi ouddoummuvaalid valmštõõllâd, håʹt korona vuäitt vaaikted siõmmna vaalpeivva.

Vaalilautakunnan puheenjohtaja Hanna-Maaria Kiprianoff.
Vaal-luʹvddkååʹdd saaǥǥtuõʹlljeei Hanna-Maaria Kiprianoff mušttal, što jiõnstummšest väʹlddet lokku vueiʹtlvaž koronavirusparru raajjtõõzz. Govva: Sara Wesslin / Yle

Juõʹǩǩ kuälmad eeʹǩǩ nuõttsäʹmmla jiõnste ođđ ouddoummust. Tän čâhčča vaal-luʹvddkåʹdd valmstââʹtt eʹpet riâššâd vaalid. Võboršiiʹǩǩid vuäitt õinn ehdted puõʹtti sueʹvet räjja.

– Miõlǩiõʹssi ääiʹjest jieʹllep kâʹl ââʹn. Lij teʹl hääʹsǩ vueiʹnned kâʹll oummu lie mieʹldd. Tuâivap, što vuäʒʒap jiânnai võboršiiʹǩǩid mieʹldd, särnn vaal-luʹvddkååʹdd saaǥǥtuõʹllʼjeei Hanna-Maaria Kiprianoff.

Tän eeʹjj vaalin lij kuuitâǥ õhtt vaiggâdvuõtt: mäʹhtt jiõnsted saaʹmi ouddoummuvaalin, jos koronavirus leävvan õinn jeänab Lääʹddjânnmest. Koronavirus da tõn tuejjääm raajjtõõzz lie obb ääiʹj riâššmõõžžin mieʹldd.

– Meeʹst feʹrttai obb ääiʹj čuâvvad tän sââʹjj koronavirus diõtt. Jos tät nuʹbb päärr puätt, nuʹtt tõʹst lie jiânnai ääʹšš, mâiʹd feʹrttai väʹldded lokku da teʹl mij plaaneet tän tõnnalla, što lij mååžna staanâld jiõnsted, mušttal Kiprianoff.

Tän sââʹjest vaalpeiʹvv puätt leeʹd mâʹte ouddâl. Jiõnstempääiʹǩ lie Čeʹvetjääuʹrest da Keväjääuʹrest 20.9. da teʹl âlddlab jiõnstummuž riâššâd raajjtõõzzi mieʹldd.

Kiprianoff åskk, što jiõntummuž vuäitt riâššâd puârast koronast huõlǩani.

– Jiõntummšest leäk õhttu da toʹben lie mieʹldd suõjjneävv ǩiõđid. Ââʹn mij puõʹtti såbbrest välʹddep puk täi aaʹššid lokku, smeâtt Kiprianoff.

Ouddooumaž veekk säʹmmlai aaʹššid õõutårra

Juõʹǩǩkaž tiuddâkksaž da sääʹmvuuʹdest jälsteei säʹmmlaž, ǩii maainâst sääʹmǩiõl vuäitt leeʹd ouddooumažvõboršeʹǩǩen.

Võboršiiʹǩǩi piijjmõš poott sueʹvet 15. påʹrǧǧmannu čiâss 12.00. Saaʹmi ouddoummuvaal ââʹnet pâʹsspeeiʹv 20.9. Vaalin vaʹlljeet saaʹmi ouddoummu poʹdde 1.1.2021 – 31.12.2023.

Saaʹmi ouddoummuvaalin vueiʹtte jiõnsted Aanar kååʹddest 51 peiʹvved ouddâl vaalpeeiʹv jälsteei tiuʹddvälddsaž sääʹm da sij pieʹllkueiʹm.

Varrasamosat: Sää´mjânnam

Váldoođđasat

Varrasamosat

Muualla Yle.fi:ssä