Säämi

Čuoigâm, uággum, kámppáást orroom, moottorkiälháin vyeijim – tain láá maaŋgâ tavekuávlu škovlâlii tälviluámu rahtum

Video: Anna-Frida Vars
Elle-Mari “Ellis” Siltala, Anna-Frida Vars já Ailu Lehmuslehti muštâleh maid sii áiguh tälviluámust porgâđ.

Elle-Mari “Ellis” Siltala, Anna-Frida Vars já Ailu Lehmuslehti muštâleh maid sij áiguh tälviluámust porgâđ.

Kiäváájäävrist ässee Elle-Mari "Ellis" Siltalast álgá puáttee ohhoost tälviluámu tego eres-uv Tave-Suoma škovlâlijn. Tälviluámu lii ive vuosmuš luámu já vuordum. Mangâs tiätá maid áigu luámust porgâđ.

Siltala vuárdá jo, et piäsá Iijäävri káámpán teivâđ huolhijd. Majemustáá lii iällám čohčuv tobbeen já talle čoggii muorjijd, tääl láá eres homáh.

– Mist lii tobbeen sierâtupe já mii hyelhih puátih tohon já mij sierâdep tobbeen taggaar ko pyhämandariini-sierâ, muštâl Siltala.

Elle-Mari Siltala
Ellis, Elle-Mari Siltala vuárdá jo, et pesâččij Ijjáávrán sierâdiđ huolhijkin Pyhämandariini-sierâ. Govva: Anneli Lappalainen / Yle

Taan sierâst sij väldih mandariinijd já liäškuh taid ááhu já äijih tupán, mii lii jieŋâskäppin ko tobbeen ij lah kihheen. Kiinii lii tobbeen, parga mottoom hitruus homá ja sust šadda talle mandariin. Taan sierâ Ellis lii jieš keksim oovtâst huolhijniskuin čohčâluámu äigin tobbeen Ijjäävrist, kost suu perruu lasseen láá meid ennuv huolhijn kámpáh já tohon sij ain čokkâneh luámui äigin.

Mandariinsierâ lii siste sierâ, mut meid olgon lii ennuv hommá tälviääigi-uv.

– Mii áigup huolhijguin kuvviđ taggaar elleekove, mon nommâ lii Lumo.

Tai lasseen Elle-Mari Siltala spiälá tuáškumpáálu já sun áigu kiergâniđ meid tuáškumpálluleeirân joo-uv Ruávinjaargân tâi Suáđikylán.

Anna-Frida Vars
Anna-Frida Vars áigu vissásávt pennuin eelliđ olgon já čuoigâđ tälviluámu äigin. Govva: Anneli Lappalainen / Yle

Vuáččulâs Anna-Frida Vars áigu pennuin eelliđ olgon, čuoigâđ já puáhtá elâččiđ kolliimin Kuovdâkiäinust.

– Čugu lii taggaar čapis nuorâ puásuipeenuv, muštâl Vars

Ailu Lehmuslehti áásá Anarist, mut sii peerâ vuálgá Illestjuuvâ káámpán viettiđ tälviluámu. Tobbeen sij vyeijih moottorkiälháin já uágguh. Kuolijd sun ij laavii koddeđ, mut tondet lijkkoo uággumist.

– Na ko tot kyeli puátá toos vuogâ luus, moijáá Ailu Lehmuslehti.

Ailu Lehmuslehti
Ailu Lehmuslehti vuálgá miäccán viettiđ häävski ko luámmu álgá. Govva: Anneli Lappalainen / Yle

Kal sun lijkkoo meid čuoigâđ, mut uáiviäšši lii et piäsá meddâl markkânist.

– Mij moonnâp tohon viettiđ häävski, illood Lehmuslehti.

Varrasamosat

Muualla Yle.fi:ssä