Sápmi |

Čuoiganluomut oidnojit Avvila dearvvašvuođaguovddáža gohcimis – buot olgobáikegoddelaš pasieanttaid testejit

Čuoiganguovddážiid olmmošmearis fuolakeahttá dilli korona ektui lea bisson oalle ráfálažžan davvin.

Ivalon johtava lääkäri Outi Liisanantti terveyskeskuksen käytävällä eristystilan edessä
Outi Liisananatti mielde Lappi buohccedikšunbiire siste lea dorvvolaš johtit. Govva: Vesa Toppari / Yle

Dálveluomut leat geasuhan olu olbmuid davás čuoiganguovddážiidda. Masá visot maŋimuš vahkuid njoammumat Lappis laktásit čuoiganluomostalliide.

Olmmošmearis fuolakeahttá dilli ain juo Anára gielddas lea bisson ráfálažžan, muitala Anára gieldda jođiheaddji doavttir Outi Liisanantti.

– Dáppe eai leat ihtán ođđa njoammumat, earret dál ilmmai, ahte Suoločielggis ledje ovddit vahkus ovcci koronapositiiva olbmo. Sin dihte leat ollugat gártan njoammunáitaga vuollái, ja mii leat dieđihan dan birra, gos dát olbmot leat johtán.

Avvila dearvvašvuođaguovddáš lea goittotge bastán gártet buohkaid, geat leat gártan njoammunáitaga vuollái. Báikkálaččat leat maiddái čuvvon dieđiheami ja viššalit fitnan teasttain, giitala Liisanantti.

Suomas álggii čuoigan- dahje dálveluopmosesoŋŋa ovddit vahkus, go vuos Mátta-Suoma skuvlalažžat ledje vahku luomus. Dán vahkus luomus leat leamašan Gaska-Suoma mánát ja boahtte vahkus fas Davvi-Suoma skuvllain álgá luopmu.

Buot olgobáikegoddelaš pasieanttain váldojuvvo koronateasta

Korona lassin čuoiganluomut barggahit dábálaččat smávva báikkiid dearvvašvuođaguovddážiid. Gaskamearalaččat moadde olbmo lápmejit iežaset Lappi čierastallanguovddážiin juohke beaivve nu, ahte dárbbašit vuosttasveahki.

Dál leatge Avvila dearvvašvuođaguovddážis váldán buot olgobáikegoddelaš pasieanttain maiddái koronavirusteastta.

– Čuoiganluomut gal oidnojit dearvvašvuođaguovddáža gohcimis. Mii leat váldán atnui Lappi buohccedikšunbiire málle, ahte testet buot olgobáikegoddelaččaid, geat bohtet dikšui ovdamearkka dihte čierastallanluohkás dáhpáhuvvan bártti dihte, čilge Outi Liisanantti.

"Ávžžuhus lea, ahte oaivegávpotguvlui ii galggašii dál mannat lupmui"

Dál maiddái Davvi-Suomas álgá čuoiganluopmu. Outi Liisanantti mielde lea oalle dorvvolaš johtit Lappi buohccedikšunbiire siste ja fitnat ovdamearkka dihte čierastallanguovddážis, go fal muitá čuovvut dorvorávvagiid ja garvá lagaškontávttaid.

Son goittotge sávvá, ahte olbmot eai jođáše dakkár guovlluin, gos lea vearrát dilli korona ektui. Liisanantti mielde ovdamearkka dihte oaivegávpotguvlui ii galggašii dál vuolgit lupmui.

– Jos fitná dakkár guovllus, de ferte mannat herkket teasttaide vaikko eai livččege dávdamearkkat, deattuha Liisanantti.

Guldal dás lasi radioođđasiid. Jietna: Yle Ođđasat Sámis

Varrasamosat: Sápmi

Váldoođđasat

Varrasamosat

Muualla Yle.fi:ssä