Sápmi |

Čuovvovaš Sámi girkobeaivvit lágiduvvojit guovtti jagi geažes – koronadili dihte eai lágit boahtte gease

Viđát Sámi girkobeivvit lágiduvvojit borgemánus 2022 Anáris.

Erva Niittyvuopio lea Oulu bismagotti sámebarggu čálli.
Oulu bismagotti sámebarggu čálli Erva Niittyvuopio muitala, ahte jagi 2022 girkobeivviid plánemat leat jo jođus ja earet eará hoteallavárrejumit leat sirdojuvvon jagiin ovddosguvlui. Govva: Vesa Toppari / Yle

Sámi girkobeaivvit sirdašuvvet jahkái 2022. Viđát Sámi girkobeivviid lei dárkkuhus ávvudit 18.–20.6.2021 Anáris.

Koronapandemiija geažil girkobeivviide nammaduvvon bargojoavkkut eai leat sáhttán čoahkkanit plánet girkobeivviid, danin go mátkkošteapmi Davviriikkain ja Ruššii lea ráddjejuvvon. Nubbi sivva lea, ahte girkobeivviide čoahkkanit olu olbmot, muitala Oulu bismagotti sámebarggu čálli Erva Niittyvuopio.

– Mii sávvat, ahte min olbmot beasašedje dasto dorvvolaččat oasálastit dáid beivviide. Bođiimet dan bohtosii, ahte lea várra vuogas dán dilis sirdit jagiin ovddosguvlui, dadjá Niittyvuopio.

Ođđa áigi girkobeivviide lea 5.–7.8.2022 ja girkobeivviid ávvudit Anáris. Beivviid fáddán lea "Bassi dolla – Bassi álbmot."

– Boares testameantta jus jurddaša, de bassi álbmot, bassi eana, Moses-girjjis gullo hui fámolaččat. Álbmot vuolgá johtui ja addojuvvo báiki, gosa guvlui vuolgit johtit. Dat lea dat okta vuođđu Biippala sánis, man mii čuovvolit, muhto lea bargojoavku geahččan maiddái eará Biippala sajiid, maid mii dasto guorahallat daid beivviid áigge, muitala Niittyvuopio čuovvovaš girkobeivviid fáttás.

Sámi girkobeivviid lágidit juohke njealját jagi. Ovddit Sámi girkobeaivvit ledje jagis 2017 Árviesjávrries Ruoŧa bealde Sámis. Dalle fáddán lei "Eallima gáldu – eallima čáhci".

Guldal dás sámebarggu čálli Erva Niittyvuopio jearahallama. Jietna: Susanna Guttorm / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä