Sápmi |

Dá leat davvisámegielat Jikŋon-filmma jietnaneavttárat – geahča maid oasáža filmmas!

Sámegillii dubbejuvvon Jikŋon-filmmas dronnet Elsa neavttaša Marianne Pentha ja prinseassa Anna fas Elin Kristina Oskal.

Frozen
Jikŋon II -filmmas dát joavku dolle davás. Govva: Disney

Disney lea viimmat almmustahttán davvisámegielat Jikŋon II -filmma jietnaneavttáriid. Filmmas leat sihke oahpes ja ođđa rollat.

Jikŋon II lea joatkkaoassi jagi 2013 almmustuvvan vuosttas Frozen-filbmii. Joatkkaoasis dronnet Elsa háliida čielggadit, manin son riegádettiin oaččui noaidefámuid.

Sámegillii dubbejuvvon filmmas dronnet Elsa jietnan gullat Marianne Pentha ja Elsa oappá, prinseassa Anna jietnan Elin Kristina Oskal. Guktot jietnaneavttárat leaba lávlut ja eret Norgga beale Sámis.

– Lea hirbmat stuorra gudni munnje, go lean ožžon Elsa rolla. Mun lean váldán barggu hui duođalaččat ja vuollegašvuođain, ja lean mearihis rámis leat oassin Sámi Jikŋon II -filmma neavttárveagas, dadjá Marianne Pentha.

Neavttárat miehtá Sámi

Anna ja Elsa lassin filmmas leat olu earáge rollat. Jietnaneavttárat leat eanaš lávlut ja eret Norgga ja Ruoŧa beale Sámis.

Nuorra Anna jietnan lea Ella Márge P. Nutti (Ruoŧŧa) ja nuorra Elsan Neda Margrethe Labba (Norga).

Muohtaáddjá Olaf jietnan lea lávlu ja neavttár Ánndaris Rimpi (Ruoŧŧa). Prinseassa Anna gándaskibir Kristoffa neavttaša lávlu Vegard Bjørsmo (Norga).

Anna ja Elsa eatni, dronnet Iduna, jietnan lea lávlu Eva Jeanette Iversen (Norga). Anna ja Elsa áhččin, gonagas Agnarin gullat njuorggánlaš Áslat Holmberg. Son lea neavttárveagas áidna, guhte lea eret Suoma beale Sámis.

Jikŋon II -filmmas Anna ja Elsa ustibiiddiskaguin mátkkoštit davás. Doppe sii deaivvadit álbmogiin, mii sulastahttá sápmelaččaid. Álbmoga jođiheaddji Jelena jietnan lea artista Mari Boine (Norga). Álbmogii gullaba maiddái Ánne-Máret vieljainis Rásttein. Ánne-Máreha neavttaša neavttár ja lávlu Ánne Mággá Wigelius (Norga) ja Rástte neavttár Ole-Gabriel Buljo (Norga).

Filmmas joavku deaivvada maiddái leutnánta Mattiasiin, geasa jiena lea addán neavttár Mikkel Gaup (Norga).

Miehtá filmma, sihke originála ja dubbejuvvon veršuvnnain, Jietna-nammasaš rollas lea norgalaš lávlu Aurora.

Davviálbmoga lahtut Ánne-Máret, Ráste ja Jelena
Davviálbmoga lahtut Ánne Máret, Ráste ja Jelena. Govva: Disney

Davvisámegillii dubbejuvvon filmma lea bagadallan Sara Margrethe Oskal. Giehtačállosa lea jorgalan Berit Margrethe Oskal.

Lávlagiid leat jorgalan Ailu Valle, Sara Margrethe Oskal ja Cathrine Bang Norum. Norum lea maiddái bagadallan lávlagiid.

Jikŋon II lea vuosttas davvisámegillii dubbejuvvon Disney-filbma. Dan vuosttaseahket lea juovlamánu 25. beaivvi.

Sámegielat filbmatrailera almmustahttet vuossárgga 25.11.

Dá oainnát oasáža davvisámegielat Jikŋon II -filmmas. Video: Disney

Filmma sámegiel veršuvdna lea Sámi Parlamentáralaš Ráđi (SPR), Sámiráđi ja Walt Disney Animation Studios ovttasbarggu boađus. Jikŋon II -filmma dahkkit leat ráđđádallan sámi verddejoavkkuin áššiin, maidda Disney filbmadahkkit leat viežžan inspirašuvnna Sámis.

Varrasamosat: Sápmi

Váldoođđasat

Varrasamosat

Muualla Yle.fi:ssä