Sápmi |

Dáiddár Marja Helander oaččui oahpahus- ja kulturministeriija Suomi-bálkkašumi

Bálkkašupmi lea lagabui 22 000 euro.

Marja Helander
Dáiddár Marja Helander lea dáidagisttis dutkan earret eará iežas identitehta suopmelaš ja sápmelaš kultuvrra gaskkas. Govva: Riikka Vaahtera/Mäntän kuvataideviikot

Dáiddár Marja Helander lea ožžon Suomi-bálkkašumi. Suoma kulturministtar Hanna Kosonen bálkkašii ovcci dáiddára ja servoša maŋŋebárgga. Juohke okta oaččui 21 625 euro.

Helander lea čuovgagovva ja -filbmadáiddár ja filbmabagadalli, gean ruohttasat leat Helssegis ja Ohcejogas. Son leage dáidagisttis dutkan earret eará iežas identitehta suopmelaš ja sápmelaš kultuvrra gaskkas.

– Helander bargá dán dilis riikkaidgaskasaš lávddis erenoamážit oanehisfilmmaid bagadallin. Su dovdet maiddái álbmotaktivistan, guhte bealušta vehádagaid ja álgoálbmogiid áššiid, ákkastallamiin čuožžu.

Marja Helander oanehisfilbma Eatnanvuloš lottit (2018) lea bálkkašuvvon máŋggain riikkaidgaskasaš filbmafestiválain, ja earret eará Tampere filbmafestivála Risto Jarva -bálkkašumiin. Son doaimmai dán jagi maiddái Mäntän kuvataideviikot -dáhpáhusa kurahtorin. Dáhpáhusa temán ledje máŋggakultuvrralašvuohta ja birasgažaldagat.

Suomi-bálkkašumiid ožžo Marja Helandera lassin sirkusdáiddár, koreográfa Ilona Jäntti, kapeallameašttir Klaus Mäkelä, hábmejeaddji Pirjo Kääriäinen, Helsinki Poetry Connection -lávdediktakollektiiva, Lainsuojattomat-teáhterfestivála, Ruskeat tytöt -media ja Raekallio Corp -dánsunjoavku. Amos Rex bálkkašuvvui gudnegirjjiin.

Oahpahus- ja kulturministeriija lea juohkán Suomi-bálkkašumi jagi 1993 rájes.

Varrasamosat: Sápmi

Váldoođđasat

Varrasamosat

Muualla Yle.fi:ssä