Sápmi |

Dákkár lea Avvila girdigietti ođđa terminála

Media beasai oahpasmuvvat Avvila viiddiduvvon girdigieddái maŋŋebárgga. Atnui terminála váldojuvvo ihttin gaskavahku.

Avvila viiddiduvvon girditerminála
Media beasai oahpasmuvvat Avvila ođđa terminálii maŋŋebárgga ja eará olbmot besset dohko gaskavahku. Govva: Kaija Länsman / Yle

Media beasai oahpasmuvvat Avvila viiddiduvvon girdigietti ođđa terminálii maŋŋebárgga.

Eará olbmot besset terminálii ihttin gaskavahku, go girdigietti ođđa oassi váldojuvvo atnui dalle.

– Check-in ja dorvvolašvuođadárkkisteapmi dáhpáhuvvet ihttá rájes ođđa bealde. Restoraŋŋabálvalusat ja hivssegat leat uhccit anus dál geassit ja čakčat, go girdigiettis leat sirdašuvvamin boares sajiin ođđa terminálii, muitala Jarmo Pyhäjärvi, guhte leat girdigietti operativalaš hoavda.

Boares beali remonta álgá dál

Dál go ođđa girdingieddevisti lea gárvvis, ođasmahttigoahtá Finavia boares beali. Boares visti galggašii gárvánit dán jagi skábmamánus.

– Čuovvovaččat mii saneret boares beali ja danin mii doapmat váldit dán ođđa beali atnui. Visot lea mannan justa nu mo plániimet. Iđitbeaivve eiseváldit leat dárkkistan sajiid ja ahte dat leat dorvvolaččat, muitala Martti Oinas Finavias.

Ođđa terminálas sadji eanet mátkkošteaddjiide

Ođđa terminála lea guokte geardde stuorát go boares girdigieddiráhkkanus.

– Loahppajagi girdigieddi galggašii leat dakkár,  ahte dat geassá eanet mátkkošteaddjiid. Dálhan mis lea guokte geardde eanet sadji. Mii bargatge dál dan ovdii, ahte oažžut eanet mátkkošteaddjiid Avvilii, muitala Oinas.

Fitnodatdoalli illuda ođđa kafeas

Taksifitnodatdoalli Soili Arrela Anáris illuda ođđa terminálas. Su mielas boares terminála lei áibbas menddo gárži.

– Girdigietti viiddideapmi ii várra oanehis áiggis váikkut fitnodatdoaimmaide moge, muhto girdimátkkošteaddjiid vuostáiváldimii dát gal váikkuha. Boares girditerminála lei menddo gárži ja dat dovdui erenoamažit juovllaid ja ođđajagi áigge, muitala Arrela.

– Guhkit áiggi siste mii sávvat eanet mátkkošteaddjiid, go dál terminálii čáhket eanet olbmot. Anárii bohtet dál olu kiinnálaččat ja sávvamis ođđa girdigieddi buktá lasi turisttaid maid ovdamearkka dihte deike Anárii, dadjá Arrela.

Boares terminálas kafea lei dorvvolašvuođadárkkistusa duohken eaige buohkat beassán dohko.

– Midjiide fitnodatdoalliide ja taksivuoddjiide dat lea erenoamaš buorre, ahte mii oažžut kafea! Ii dárbbaš šat vuolgit Avvila guovddážii!

Varrasamosat: Sápmi

Váldoođđasat

Varrasamosat

Muualla Yle.fi:ssä