Sápmi |

Dálá sámediggeáirasiin juohke goalmmát álgimen evttohassan – "In oainne boikoterema suvdilis vuohkin"

Yle Sápmi jearai dálá sámediggelahtuin, áigotgo sii álgit evttohassan dán jagáš sámediggeválggaide. Sámediggeválggaid evttohasásaheapmi nohká bearjadaga 2.8. diibmu 16.00.

Saamelaiskäräjät 2016–2019.
Sámediggi 2016– 2019. Govva: Saamelaiskäräjät

Muitaleimmet bearjadaga 2.8., ahte Sámi Árvvut -searvi ávžžuha sápmelaččaid boikoteret evttohasásaheami ja jienasteami čavčča 2019 sámediggeválggain. Yle Sápmi jearai dálá sámediggeáirasiin, áigotgo sii álgit evttohassan dán jagáš válggaide, vai boikoteretgo sii sámediggeválggaid.

Aŋkke čiežas dálá sámediggeáirasiin áigot álgit evttohassan, eaige earátge njuolga daja boikoteret válggaid, vaikko eai livččege álgimen evttohassan.

Dálá Sámedikkis goit čiežas álgimin evttohassan

Evttohassan leat álgimen goit Anu Avaskari, Tuomas-Aslak Juuso, Neeta Jääskö, Pigga Keskitalo, Kirsti Kustula, Kari Kyrö ja Ulla-Maarit Magga.

– Dálhan leat válggat boahtimen sámediggelága mielde, ja buohkat geat háliidit váikkuhit sápmelaččaid áššiide, háliidit álgit evttohassan, oaivvilda Anu Avaskari.

Tuomas-Aslak Juuso fas oaivvilda, ahte jos dál addá vuollái, lea addimen válddi earáide. Dan oaivvilda maiddái Neeta Jääskö.

– In oainne boikoterema suvdilis vuohkin. Jos mii boikoteret, mii leat ieža addimen válddi eret, dadjá Jääskö.

Pigga Keskitalo muitala son lea álgimen evttohassan válggaide. Son dadjá, ahte ii leat boikohtaolmmoš, baicce háliida dikšut ášši demokráhtalaččat.

Ulla-Maarit Magga oaidná, ahte dal lea dakkár dilli, ahte galgá bargat sámiid áššiid ovdii ja ovddidit daid.

Kirsti Kustula ii lean iđitbeaivve oaidnán Sámi Árvvut -searvvi dieđáhusa, mas searvi ávžžuha boikoteret válggaid. Kustula ii váldde beali searvvi ávžžuhussii, ja muitala ahte dán muttus son goit lei álgimen evttohassan.

– Mu mielas sámiid iešstivrejupmi galggašii goittotge seailluhuvvot, dadjá Kustula ja lasiha ahte leahan das vel áigi dievasmahttit dahje geassit evttohasohcamuša eret.

Vaikko sámediggeválggaid evttohasásaheapmi nohká dán vahku bearjadaga diibmu 16.00 rádjái, sáhttá válljensearvvi áššeolmmoš dievasmahttit dahje njulget ohcamuša dieđuid disdaga 6.8. diibmu 16:00 rádjai.

Goit gávccis eai álgge evttohassan

Yle Sámi gažadeami mielde sámediggeáirasiin goit gávccis leat báhcimen eret Sámedikkis. Sii leat Jouko Hetta, Aslak Holmberg, Petra Magga-Vars, Heikki Paltto, Pentti Pieski, Jan Saijets, Tiina Sanila-Aikio ja Antti Sujala.

Jouko Hetta ii boikotere válggaid, baicce lea dahkan mearrádusa eret báhcimis jo ovdal Sámi Árvvut -searvvi ávžžuhusa. Son oaivvilda, ahte sápmelaččat eai galggaše álgit boikoteret, go dat addá saji eará olbmuide.

Petra Magga-Vars ii váldde boikoteremii beali, muhto muitala, ahte ii hálit iežas oassálastimiin dohkkehit stáhta assimilerenpolitihkkamálle, mii dárkkuha ahte sápmelaččaid iešmearridanrievtti deaddit vulos, iige nuppe gežiid, nannejuvvo. Maiddái persovnnalaš sivat váikkuhit, ahte son ii álgge evttohassan.

Heikki Paltto ii daja njuolga áigugo boikoteret válggaid, muhto oaivvilda ahte dát dilli sáhttá dagahit dan, ahte olbmot sáhttet boikoteret, jos stáhta ii álgge ráđđádallat sámiiguin. Paltto ii maid dieđe vel, áigugo jienastit válggain.

Antti Sujala báhcá eret válggain bargguid dihte, muhto áigu goittotge jienastit. Maiddái Pentti Pieski sikte áiggi iežas bargguide, ja áigu jienastit válggain. Pieski dadjá iežas dahkan mearrádusa eret báhcimis jo ovdal duorastaga AHR mearrádusaid válgalogahallanáššis.

Jan Saijets, Tiina Sanila-Aikio ja Aslak Holmberg leat jo ovdalis dán jagi almmuhan, ahte eai leat álgimin evttohassan sámediggeválggain.

Jouni Aikio ii vel odne gaskabeaivvi sulaid diehtán, áigugo álgit evttohassan vai ii. Son oaivvildii, ahte lea vel moadde diimmu áigi smiehttat ášši ja mearridit.

Yle Sápmi riŋgii buot sámediggeáirasiidda gulaskuddan dihte áigotgo sii álgit evttohassan. Eat fáhten ságaide ovdal diibmu 14.00 čuovvovaš sámediggeáirasiid gullan dihte sin oaiviliid áššis: Veikko Feodoroff, Anne Nuorgam, Tanja Sanila, Magreta Sara ja Nilla Tapiola.

Varrasamosat: Sápmi

Váldoođđasat

Varrasamosat

Muualla Yle.fi:ssä