Sápmi |

Dan áigái man ovdal geavahii juhkamii, dasa fertii gávdnat juoidá eará – Dál Varsi duolbmalii duháhiid kilomehteriid guhkkosaš mátkái

Sirbmálaš Tor Asle Varsi lea álggahan logi vahku sihkkelmátkkis čađa Davviriikkaid.

Tor Asle Vars.
Mun lean alkoholista, dahjege goikaduvvon alkoholista. Dáinna mátkkiin háliidan čalmmustahttit alkoholisttaid dili, muitala Varsi. Govva: Kaija Länsman / Yle

Suoločielggi bensiidnastašuvnna olggobealde almmái ráhkkana duolbmalit njeallje miilla, dasto lea čuovvovaš boddu Vuohčus.

Máŋge geahppa giđđatuvrras ii leat sáhka baicce Tor Asle Varsi áigu duolbmat duháhiid kilomehteriid. Mátki bistá sullii logi vahku.

Hearvva dihte ii vuolgge duolbmat Sirpmás Mátta-Norgii.

– Mun lean alkoholista, dahjege goikaduvvon alkoholista, govvida Varsi iežas.

– Mun lean geavahan olu áiggi čalmmustahttit alkoholisttaid váttisvuođaid. Dat lea okta mátkki sivva.

Vars duolbmá sihkkeliin, mas galgá mieigat maŋos ja duolbmat. Sihkkel lea symbola Norgga gárrenmirkkopolitihkkii, muitala Varsi.

– Norgga gárrenmirkopolitihkka lea veallut mu mielas. Norggas ii leat diekkár gárrenmirkko-organisašuvdna, dakkár miellahtto-organisašuvdna, mii doaibmá miehtá riikka ja mii beasašii njuolga ráđđádallat eiseválddiiguin.

Varsis lea miella oažžut johtui Norggas miellahttosearvvi ja danin duolbmá veallut.

– Norggas leat olu priváhtta organisašuvnnat, dat eai goit beasa njuolgga eiseválddiid lusa. Buot eará dávddain lea iežaset organisašuvdna. Dat lea stuorra erohus das maid sii olahit, ja maid mii eat olat, oaivváldallá Varsi.

Tor Asle Varsi lei maŋŋebargga ollen Suoločielgái. Duolmmakeahttá leat vel duháhat kilomehterat.
Tor Asle Varsi duolbmá sihkkeliin, mas galgá mieigat maŋos ja duolbmat. Govva: Kaija Länsman / Yle

Dan áigái maid ovdal geavahii juhkamii, dasa fertii gávdnat juoidá eará

Varsi heittii juhkamis čakčat 2006. Juhkanmiella ii leat das rájes leamašan. Dál son bastá dakkár dáguide maidda gallis eai. Dalle go jugai, valáštallan ii lean nu stuorra oasis su eallimis.

– Dalle go juhken, beroštupmihan gal lei valáštallamii, muhto dalle das gal ii boahtán mihkkige, veahá lávejin duollet dállet čuoiggadit, muittaša Varsi.

Go beasai jugešvuođas, valáštallan buvttii sutnje ilu ja loktii iešdovddu. Vars rávve sin, geat vigget beasadit jugešvuođas, ahte sii álget lihkadit.

– Dat mii lea váttisvuohta máŋgasiidda, lea dat go áigot heaitit juhkama ja rievdadit eallima, dat áigi mii ovdal manai juhkamii, dat ii leat šat dus.

Varsi diehtá mas hállá ja son leage geavahan olu áiggi olgun orrumii ja valáštallamii. Dat lea veahkehan ja leamašan dego terapiija.

– Dalle lea dehálaš gávdnat eará maid barggat dan áiggis, man ovdal geavahit juhkamii.

Dás duohko Varsi duolbmá miehtá geasi, miehtá Davviriikkaid. Jus lagaš beivviin deaivvat oaidnit Suoma Sámis albmá, guhte veallá ja duolbmá sihkkeliin ovddos guvlui, dieđát gii son lea ja sáhtát seavvit ja sávvat sutnje buorre mátkki.

Dá gulat Tor Asle Varsi jearahallama. Doaimmaheaddjin Kaija Länsman. Jietna: Yle Areena

15.5.2019 dii 11.00: Divvojuvvon Tor Asle Varsi namma. Ovdal muitaleimme boastut su goarggu leat Vars.

Varrasamosat: Sápmi

Váldoođđasat

Varrasamosat

Muualla Yle.fi:ssä