Sápmi |

Dán albmá lea Sipilä bidjan čielggadit sámeáššiid – Stáhtaministtara erenomášovddasteaddji johtán dán gease davvin

Davvin lea dán gease johtán alla dási almmái čielggadeamen sámeáššiid. Son lea Suoma stáhtaministtar Juha Sipilä sádden erenomášovddasteaddji Antti Pentikäinen. Sus lea vásáhus kriisa- ja konfliktabargguin miehtá máilmmi.

Antti Pentikäinen
Davvi-Suomas lea dán gease johtán stáhtaministtar Juha Sipilä (guovd) erenomášovddasteaddji Antti Pentikäinen (govas) gulaskuddamin sámeáššiid. Govva: Yle

Yle Sápmái leat boahtán máŋggat cavgileamit das, ahte Davvi-Suomas lea dán gease johtán stáhtaministtar Juha Sipilä (guovd) erenomášovddasteaddji gulaskuddamin sámeáššiid.

Stáhtaministtara doaimmahat nanne dieđu.

Erenomášovddasteaddji viežžamin lassedieđuid Sipiläi

Yle Sámi dieđuid mielde Sipilä lea bidjan iežas erenomášovddasteaddji Antti Pentikäinen viežžat lassedieđuid sámeáššiid birra ja Pentikäinen leage dán gease deaivan olbmuid miehtá Sámi.

– Pentikäinen bargu laktasa Sipilä miessemánus dahkan mátkái Anárii, Sipilä doaimmahagas kommenterejit oanehaččat.

Juha Sipilä eduskunnassa.
Juha Sipilä Govva: Jarno Kuusinen / AOP

Erenomášovddasteaddjis vásáhus kriissain miehtá máilmmi

Antti Pentikäinen lea maŋimuš áiggiid bargan stáhtaministtara erenomášovddasteaddjin Gaskameara ja Eurohpa báhtareaddjikriissas.

Aviisadieđuid mielde Sipilä bovdii su dán doibmii dikšut kriissa.

– Antti Pentikäinen doaibmá Girku Olgoriikkaveahki doaimmajođiheaddjin iige oaččo báhtareaddjikriisabarggus sierra bálkká, Suomenmaa-aviisa muitalii čakčamánus 2015.

Antti Pentikäinen ja Hussein Al-Taee A-studion vieraina.
Antti Pentikäinen ja Hussein Al-Taee, A-studio 16.11.2015. Govva: Yle
Yle Ođđasiid mielde Pentikäinen bargá maid ON ráfisoabahanfierpmádaga hoavdan.

Verkkouutiset-aviissa mielde Pentikäinen lea ovdal bargan hálddahushoavdan ovdalaš presideanta Martti Ahtisaaari Crisis Management Initiative -fitnodagas.

Dat doaibmá ráfisoabahallin miehtá máilmmi.

Jagiid 2010–2011 Pentikäinen barggai USA:s Religions for Peace -organisašuvnna konflivttaeastadan- ja ráfibarggu prográmmaid hoavdan.

Sipilä deaivvai Sámedikki giđđat

Stáhtaministtar Juha Sipilä galledii miessemánu beallemuttus Anáris.

Sámediggi ja Sipilä
Govva: Pia Ruotsala / Sámediggi
Son oahpásnuvai mátkki áigge Sámedikki láhkaásaheapmái, sápmelaččaid sajádahkii eamiálbmogin, Sámedikki hálddahussii ja Sámedikki dán válgabaji guovddášulbmiliidda.

Maid vuoigatvuohta- ja bargoministtar Jari Lindström (vs) lea galledan Anáris sámeáššiid olis.

Čoavddekeahtes sámeáššit váivvidit

Máŋga sámeášši leat Suomas čoavddekeahttá ja dat lea heajudan Suoma Sámedikki ja stáhta gaskavuođaid.

– Mun oainnan ahte dát dilli ii sáhte joatkahuvvat, dat dilli dárbbaša čovdosa. Mii dárbbašit dan sápmelaččaid ja Suoma stáhta gaskasaš sierramielatvuhtii čovdosa. Dat čoavddus lea dehalaš min boahttevuođa ektui, Sámedikki ságadoalli Tiina Sanila-Aikio dajai Yle Sápmái giđđat 2016.

Čoavddekeahtes sámeáššiin fuolakeahttá Suoma dálá ráđđehusprográmmas eai leat sámeáššit máinnašuvvon ollenge iige Sámediggi beassán mielde ráđđehusráđđádallamiidda.

Sámedikki ságadoallit 2016-2019.
Ságadoallit / Puheenjohtajisto: Heikki Paltto (gur./vas.), Tiina Sanila-Aikio ja Tuomas Aslak Juuso Govva: Vesa Toppari / Yle
Suomas lea guhká digáštallojuvvon sápmelačča meroštallamis ja eamiálbmogiid rivttiid ILO 169 -soahpamuša ratifiseremis. Sámediggelága ođasmahttin gopmánii ja ILO-soahpamuš bázii beavddi ala mannan ráđđehusbajis.

Giđđat olbmuid hirpmástuhtii dat, ahte sámečuoggát gahčahuvvojedje eret ođđa meahciráđđehuslágas.

ILO-bargu lea goittotge joatkašuvvan Sipilä áiggege ja ráđđehus diŋgui giđđat 2016 Lappi universitehtas čielggadeami sámi rivttiid ja ILO-soahpamuša birra. Čielggadeapmi galgá leat gárvvis juovlamánus 2016.

Varrasamosat: Sápmi

Váldoođđasat

Varrasamosat

Muualla Yle.fi:ssä