Sápmi |

Dán dálvvi boazocup ordnejuvvo máttit bálgosiid guovlluin – Norgga hearggit váilot goit vel moadde jagi

Suoma boazocup-oassegilvvut lágiduvvojit dán dálvvi viđa báikegottis sámeguovllu olggobealde.

Seppo Koivisto Roavvenjárga
Suoma boazovuoddjiid searvvi ságajođiheaddji Seppo Koivisto Roavvenjárggas. Govva: Privahtta govva

Suoma dán dálvvi heargevuodjincup, Poro Cup 2020, oassegilvvuide leat juo ráhkkaneamen dievas fárttain.

Dát lea viđát dálvi, go Suomas lágiduvvo heargevuodjincup. Oassegilvvut leat dán dálvvi vihtta ja daid leat mearridan doallat guovvamánu rájes máttit bálgosiid guovlluin: Roavvenjárggas, Pudasjärvis, Äkäslompolos, Sallas ja Kuoskus. Dán vuoro oktage oassegilvu ii leat Sámis.

Cup-gilvvuin eanemus čuoggáid čoaggán hearggit besset oassálastit árbevirolaš Anára heargegonagasvuodjimiidda, mat leat maiddái boahtte giđa. Heargegonagasvuodjimat leat Anárjávrri jieŋa alde boahtte njukčamánu 28.–29. beivviid.

Norgga bohccuid vurdet moatti jagi geažis fárrui

Suoma heargevuoddjiid searvi lea doaibman vihtta jagi ja dál gilvohearggit leat searvvi registaris badjel 700. Juohke jagi registrerejuvvojit lagabui beannot čuođi hearggi, mii čujuha dasa, ahte mokta gilvvohallansuorgái lea bures seilon.

Norgga beale hearggit eai goit leat moatti jahkái beassan oassálastit Suoma beale gilvvuide gazzaealliid CWD-dávdavára dihte. Gielddus lea fámus vel aŋkke maŋit jahkái.

– Bohccuid ii lea lohpi buktit Suoma beallái, muhto mun jáhkán, ahte go gielddus gomihuvvo maŋit jagi, de sii gal šávihit min gilvvuide fárrui, árvala Suoma boazovuoddjiid searvvi ságajođiheaddji Seppo Koivisto Roavvenjárggas.

Gilvvut geasuhit ain eanet sihke geahččiid ja gilvaleaddjiid

Gilvvohalliid lassin maiddái geahččit leat gávdnamin heargegilvvuid.

Suoma boazovuoddjiid searvvi ságajođiheaddji Seppo Koivisto muitala, ahte turismma lassáneapmi lea dovdogoahtán maid heargegilvvuid geahččiid mearis. Jearaldagas lea eksohtalaš vásáhus, go boazoformulat váldalit gilvobána alde.

– Erenomážit mannan ja ovddit jagi geahččit leat boahtán valjis čuovvut gilvvohallamiid. Ovdamearkka dihte Roavvenjárgga gilvvuin lávejit ollu geahččit.

Seppo Koivisto muitala, ahte heargevuodjindoaibma lea jagis nubbái dušše sturron. Su mielas lea buorre, ahte mielde leat gilvvohallit ja heargeeaiggádat miehtá Suoma. Koivisto sávvá dan joatkašuvvat maiddái boahtteáiggis.

– Mielde leat rattát nu sámi boazodoallit go mátta boazodoallit. Dat lohpida buori boahttevaš gilvodoibmii Suomas, oaivvilda Koivisto.

Varrasamosat: Sápmi

Váldoođđasat

Varrasamosat

Muualla Yle.fi:ssä