Sápmi |

Dán jagáš Ijahis ija konsearta orru artisttaide gelddolaš ja ođđaáigásaš

Rap-artista Ailu Valle sávvá, ahte konsearta buktá olbmuid oktii iešguđet guovlluin máilmmis. Juoigi Ingá-Máret Gaup-Juuso oaidná, ahte digitála konsearttain sáhttá olahit eambbo olbmuid.

Ailu Valle Ijahis Idja 2018
Ailu Valle Ijahis idja -festiválas jagis 2018. Govva: Vesa Toppari / Yle

Dán jagáš Ijahis idja -musihkkafestivála konsearta ordnejuvvo gáiddusin. Dát soaitá veháš earenoamáš vuohki artisttaide, geat leat hárjánan ahte olbmot leat dábálaččat báikki alde čuovvumen konsearttaid.

Okta Ijahis ija konseartta násttiin, rap-artista Ailu Valle jáhkká konsearttas šaddat gelddolaš, vaikko sus leage jo vásáhus ĺivestream-konsearttas, go son loaiddástii Raahes mánnu dassái.

– Dashan gal oinnii makkár vásáhus dat lea. Ovddalgihtii dieđusge smihtten, ahte moson dat lea go lea okto lávddi alde eaige leat olbmot geahččamen. Gal dat lihkká lei gelddolaš, go diđii ahte olbmot leat doppe ruovttuiguin čuovvumin. Jáhkán dát konsearta maid šaddá gelddolaš, vaikko dál in leat okto doppe lávddi alde.

"Ferte govahallat, ahte olbmot duođas liikojit"

Valle jurddaša, ahte vaikko eai livčče ollenge geahččit báikki alde, galggašii lihkká máhttit addit nu olu olggos guvlui go vejolaš.

– Ferte govahallat, ahte olbmot duođas liikojit dasa maid doppe bargá. Muhto mii leat máŋggas doppe lávddi alde, de doppe lea somá leat ovttas.

– Máŋgiihan lea vel nie beliid, ahte jos olbmot eai leat geahččamin, de dallehan dat lea goas nu juobe álkitge leat doppe lávddi alde, son bohkosa.

Valle illuda, go olbmot besset iešguđet guovlluin čuovvut gáiddusin ordnejuvvon konsearta.

– Diet gal lea somá, ahte olbmot besset miehtá máilmmi čuovvut. Dahje in gal duođas dieđe dárkilabbot mo dat oaidninvuoigatvuođat leat ráddjejuvvon, muhto sávan ahte dat buktá olbmuid oktii juohke sajis, iešguđet guovlluin máilmmis.

"Čuovvu ođđaáigásaš vuogi"

Ingá-Máret Gaup-Juuso lea nubbi Ijahis ija dán jagáš konseartta juoigiin. Gaup-Juuso lea hárjánan dasa, ahte olbmot leat dábálaččat báikki alde geahččamen ja guldaleamen, muhto sutnjege lea boahtán giđa áigge vásáhus livestream-konsearttain.

– Dat dieđusge čuovvu dan ođđaáigásaš vuogi. Oainnán dás maiddái buriid beliid. Digitála konsearttaiguin mii sáhttit olahit kánske eambbo olbmuid. Lean dieđusge maiddái issorasat váillahan diekkár dábálaš konseartavugiid, muhto lean oaidnán ahte livekonsearttat maiddái doibmet ja dainna lágiin olaha guldaleaddjiid.

Tundra Electo Ingá-Máret Gaup-Juuso Ijahis Idja 2018
Govas Ingá-Máret Gaup-Juuso Ijahis ijas jagis 2018, go son loaiddastii Tundra Electro -joavkkus. Govva: Vesa Toppari / Yle

Dán jagi temákonseartta bokte festivála háliida čájehit iežas doarjaga Giehtaruohttasa guovllu árbevirolaš geavaheddjiide ja dadjat ovttas ii ruvkedoaimmaide Sámis. Dat lea earenoamáš dehálaš Gaup-Juusoi.

– Lea hui fápmudahtti leat mielde namalassii dán konsearttas, go das lea goittotge sáhka min boahtteáiggi birra. Dieinna ládje dat boahtá leat dovdduid dáfus ja obanassiige ovdanbuktima dáfus stuoris.

Konsearttas loaiddastit Ailu Valle ja Ingá-Máret Gaup-Juuso lassin maiddái Gájanas-joavku ja juoigi Juha Tornensis.

Ijahis idja -konseartta sáhttá čuovvut lávvardaga 15.8. diibmu 19.00 rájes čujuhusas www.sajos.fi/live.

Varrasamosat: Sápmi

Váldoođđasat

Varrasamosat

Muualla Yle.fi:ssä