Sápmi |

Dán jagi besse álgit maŋŋit lohkat luosaid skádjaseasaniin Deanus - dutki: unnán dittit dán rádjái

Dábálaččat Deanus leat beassan lohkagoahtit luosaid skádjaseasaniin moadde vahku árat, miessemánu bealde.

Luke dutki Panu Orell
Unnán leat dittit dihtostan dán rádjái, muhto dulvi soaitá dagahan, ahte guolit gorgŋot johkii maŋŋelut, dadjá Luke dutki Panu Orell. Govva: Vesa Toppari / Yle

Alla dulvi lea maŋidan dán gease luossalohkama Deanus. Skádjaseasanlohkan álggii geassemánu 10. beaivve, muitala Luondduriggodatguovddáš Luke dutki Panu Orell. Dábálaččat Deanus leat beassan lohkagoahtit luosaid skádjaseasaniin moadde vahku árat, miessemánu bealde.

Geassemánu 10. beaivves gitta suoidnemánu 1. beaivve rádjái leat dál gorgŋon sullii 7 000 luosa, mii lea olu uhccit go jagis 2018. Maiddái diibmá gorgŋo muhtin veardde eanet luosat go dál.

– Unnán leat dittit dihtostan dán rádjái, muhto dulvi soaitá dagahan, ahte guolit gorgŋot johkii maŋŋelut, dadjá Orell.

Skádjaseasan jogas.
Skádjaseasan jogas. Govva: Panu Orell / LUKE

Diibmá lei Deanus fuones luossajahki

Detnui gorgŋo mannan gease unnán luosat, čájehit Luondduriggodatguovddáš Luke dutkamušat.

Skádjaseasaniid dieđuid mielde Detnui gorgŋo mannan gease sullii 21 000 luosa, go ovddit gease luosat ledje badjel 32 500.

Dánge gease orru šaddamin fuones luossajahki, árvala Luke dutki Panu Orell.

– Ii dás illudit gal vuos gánnet, vaikko leage vel árrat einnostit dili.

Skádjaseasan báiki lea dakkár sajis, gokko johka čiekŋu dássidit, iige dakko leat jorričáhci.
Skádjaseasan báiki lea dakkár sajis, gokko johka čiekŋu dássidit, iige dakko leat jorričáhci. Govva: Panu Orell / LUKE

Luondduriggodatguovddáš čuovvu luosaid goargŋuma skádjaseasaniiguin. Deanus Buolbmát buohta ja Anárjogas Gáregasjotnjálmmis skádjaseasanat govvejedje johkabotni diibmá jo nuppi gease.

Video: Skádjaseasana govva, mas lohket luosaid.

Luossabivdi: Deanus reahkká luossa

Rauna Guttorm Báđošis, Ohcejogas, lea viššal bivdit luosa Deanus. Son lea goddán bures luosaid dál álgogease iežas dárbui, muhto su mielas lea váttis goittotge einnostit makkár luossageassi lea šaddamin.

– Mun lean buođu bidjan ja sirdán jo oktii dan buođu ja de lea okta buođđoreŋko bieđganan, mun fertejin ođđa bidjat. Oaidnit leš mo manná, muitala Guttorm.

Guttorm lea buođus goddán moadde ditti, mat leamaš vuollel 3 kilo ja de vel 6-13 kilo luosaid.

– Ja de lean vuokkas goddán vel moadde. Mu mielas orru, ahte jogas reahkká luossa, árvala Guttorm.

Video: Rauna Guttorm kokemassa lohipatoa
Rauna Guttorm Báđožis iská luossafierpmi buođus geassemánu 23. beaivve Video: Anneli Lappalainen / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä