Sápmi |

Dán jagi oaidnit Sámi Grand Prixa neahttasáttan NRK:s – Ailu Valle: "Ámmátolmmoš galgá leat gárvvis masa beare"

Musihkkaovdanbuktimat čájehuvvojit videoin, eaige olbmot leat seamma sajis, muitala dáhpáhusa jođiheaddji Ol-Johan Gaup.

Ingá Márjá Sarre ja Ailu Valle
Ingá Márjá Sarre ja Ailu Valle oassálastiba Sámi Grand Prixii bihtáin "Beassášlihkku". Govva: Johan Mathis Gaup / Marko Vasara

Sámi Grand Prix 2021 lágiduvvo dán jagi neahtas streamakonseartan. Oahpes vuogi mielde Sámi Gran Prixas lea sihke juoigan- ja lávlungilvu. NRK sádde gilvvu beassášlávvardaga.

Ovdanbuktimat leat báddejuvvon ovdalgihtii, eaige oassálastit leat Báktehárjjis, dego dábálaččat.

– Mii leat de bádden iešguđet guovlluin, gos oassálastit leat eret. Ja galget leahkit mielde "liven" iešguđet guovllus, de šaddá dakkár studiosátta ollásit. Eai leat dieđusge geahččit dan sáles, muhto miehtá Sámi galget beassat geahččat dan sáddaga, muitala dáhpáhusa jođiheaddji Ol-Johan Gaup.

Oassálastit miehtá Sámi dego álohii

Rap-artista Ailu Valle ovttas Iŋgá Márjá Sarrein oassálastá Gran Prixa lávlunoassái. Valle lohká Yle Sápmái, ahte soai leaba videos oktanaga, muhto son ii sáhte muitalit gos ja goas dat lea govvejuvvon.

Gilvaleamen lávlunoasis leat maid Bernt Mikkel Haglund, Yarsem Galkin ja Roman Jakolev, Ingá Máiiá Blind, EiRA ja Hildá Länsman ja Lávre.

Juoiganoassái oassálastet Nils Peder A. Gaup, Nils Lars Eira, Hanna-Maaria Kiprianoff, Máhtte Ánte J. Sara, Domna Khomjuk, Kim Hallgeir Berg, Johan Anders Oskal, Nils Johan A. Gaup, Jörgen Stenberg ja Elen Rávná A. Triumf.

NRK siidduin leat almmustahtton juo ovdalgihtii smáhkabihtážat luđiin ja lávlagiin.

Oassálastit leat stuorámus oasil seammát go diibmá almmuhuvvui, dušše unna rievdadusaiguin.

– Illudan, dat lea jalla buorre dássi dán gilvvus, Ol-Johan Gaup lohká.

Valle: "Ámmátolmmožin galgá leat gárvvis masa beare"

Oppa ollisvuođas šaddá dán háve hui earálágán, go masa jagiid mielde Guovdageainnus leat hárjánan. Eai leat stuorra olmmošjoavkkut, ii beasa ovttastallat iige návddašit sámi musihkkafálaldagas báikki alde. Dál dilli lea oalát earálágán, muhto lihkká dáhpáhus ollašuvvá.

Ailu Valle lea ovdanbuktán musihkas máŋggalágán arenain, iige dát dilálašvuohta dahje dan ordnenvuohki su hehtte.

Ailu Valle Ijahis Idja 2018
Ailu Valle ii leat ovdal oassálastán Sámi Grand Prix -gilvui. Arkiivagovva. Govva: Vesa Toppari / Yle

– Leahan dat dasto earálágán, muhto ámmátolmmožin galgá leat gárvvis masa beare, árvala Valle.

– Vaikke livčče duhát olbmo geahččamin dahje okta olmmoš, lihkká figgá addit buot maid sáhttá ja nákce doppe lávddi alde, Valle lohká.

Jáhkkimis ii gealdašuva nu sakka, go ovdanbuktá virtuálalaččat

Hanna-Maaria Kiprianoff oassálastá nuppádassii Sámi Grand Prixii. Son muitala, ahte láve leat álo hui gealdagasas ovdal ovdanbuktimiid ja danin son jáhkkáge virtuála ovdanbuktima leat álkit.

Hanna-Maaria Kiprianoff
Hanna-Maaria Kiprianoff lea bargan bihtá iežas ristniidii. Govva: Ville Fofonoff / Yle

Kiprianoff mielas virtuála musihkkagilvu gullá otnábeai máilbmái.

– Hástalus lea, mo gávdnat rivttes dovddu, Kiprianoff smiehttá.

Sámi Grand Prix sáddejuvvo NRK tv-sáttan ja NRK Sámi Rádios beassášlávvardaga diibmu 18 rájes Norgga áiggis.

Yle Ođđasiid Sámis ja Beaivvi ságaid sáhtát guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä