Sápmi |

Dán jagi Väyläfestivála govvejuvvo filbman – lágideaddjit hálidit goittot juoidá fállat dánge jagi, vaikko eai sáhtege lágidit dáhpáhusa dego ovdal

Filmma govvejit 9.–11.7.2020 ja dat galggašii leat gárvvis čakčat.

Paavali Jumppanen
Mii eat máhte oaidnit dáhpáhusa dakkárin, ahte festiválaguossit ja loaiddasteaddjit eai beasaše friija rasttildit Suoma, Ruoŧa ja Norgga rájáid, muitala dáiddalaš bargojoavkku jođiheaddji Paavali Jumppanen. Govva: Jaakko Alatalo / paavalijumppanen.com

Durdnosleagi rájáid rasttildeaddji Väyläfestivaali-dáhpáhus lágiduvvo dán jagi filbmahámis koronadili dihte. Dáhpáhusa dáiddalaš bargojoavkku jođiheaddji Paavali Jumppanen muitala, ahte sii hálidit goittot juoidá fállat dánge jagi, vaikko eai sáhtege lágidit dáhpáhusa dego ovdal.

– Mii eat máhte oaidnit dáhpáhusa dakkárin, ahte festiválaguossit ja loaiddasteaddjit eai beasaše friija rasttildit Suoma, Ruoŧa ja Norgga rájáid. Dálá dilis dat ii lihkostuva vel, muhto hálidat goittot doalahit dáhpáhusa doaibmajurdaga.

Filmma ovdanbuktimiid govvejit golmma beaivvi áigge geahččiid haga siste ja olgun Badjedurdnosis, Övertorneås, Äkäslompolos, Geatkesavvonis ja Ivguvuonbađas 9.–11.7.2020. Mielde leat artisttat Suomas, Norggas ja Ruoŧas. Mielde lea musihkka, sátnedáidda ja dánsadáidda.

– Mii čohkket das albma filmma, nu ahte dat ii leat dakkár livestriima, man sáhttá geahččat sosiála medias dahje muđui interneahtas. Dasa lea dahkkon giehtačálus ja dat editerejuvvo. Gárvvis dat galggašii leat čakčat, muitala Jumppanen.

Filmmas leat mielde earet eará Duo Arvvas -joavku ja dáiddár Leena Valkeapää

Filmmas loaiddastit reggaejoavku Trio Meänland, dánsadáiddár Katariina Angeria ja musihkkar Outi Pulkkinen duo, Duo Arvvas ja pianista Paavali Jumppanen. Dan lassin diktačálli Mona Mörtlund lohká iežas divttaidis ja dáiddár Leena Valkeapää ovdanbuktá Nils-Aslak Valkeapää divttain ja eallinbálgás muitaleaddji ollisvuođa.

Duo Arvvas -joavkku nubbi artista Sara Marielle Gaup Beaska muitala, ahte ii vuos rievtti mielde dieđe nu olu dan birra, mo dat šaddá. Joavkku oassi filbmii govvejuvvo ihttin bearjadaga.

– Dat leat lohkan, ahte das šaddá eambo dego dokumentára dan festivála birra. Lágideaddjit hálidedje, ahte moai bohte čuojahit Lássagámmis. Ja sii leat válljen munno dan dihte, ahte Áillohaš rohkki lávii hui viššal seaguhit sámemusihka maiddái eará kultuvrrain ja gielain, muitala Gaup Beaska.

Árvvas: Sara Marielle Gaup Beaska ja Steinar Raknes
Duo Arvvas -joavkku Sara Marielle Gaup Beaska ja Steinar Raknes ovttastahttiba luođi ja americana musihkkašlájaid. Govva: Lars Opstad

Dáiddár Leena Valkeapää Eanodagas fas buktá oidnosii Áillohačča divttaid vuoiŋŋa ja dáiddáriid gaskasaš oktavuođa.

– Mu dáidaga jurdda lea Áillu divttaid fárus govvet vuolgima, máhccama ja johtti sámi miela davás geasi guvlui. Guossavuvddiin beahcevuvddiid čađa duoddariidda ja riddui mearralottiid háikasa guvlui. Jurddan lea buktit Áillu divttaid máilmmi festivála olbmuid oidnosii ja gullosii, muitala Valkeapää.

Leena Valkepää
Dáiddár Leena Valkeapää ovdanbuktá filmmas Nils-Aslak Valkeapää divttain ja eallinbálgás muitaleaddji ollisvuođa. Govva: Ville Kumpulainen

Filbma govvejuvvo festivála dáhpáhusbáikkiin ja dan bagadallá Benjamin Åkerblom. Das gullojit Durdnosleagi vihtta giela ja dat tekstejuvvo riikkaidgaskasaš juohkima várás.

Prošeavtta ruhtadit Davviriikalaš kulturfoanda, Arctic Pulse - fidnu sihke oahpahus- ja kulturministeriija.

Guldal dás Paavali Jumppanen, Sara Marielle Gaup ja Leena Valkeapää jearahallamiid. Jietna: Jouni Aikio / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä