Sápmi |

Dán skábmaáiggi mátkkoštit olles 17 000 olbmo girddi Eanodahkii: máŋgga jagi jaskatvuođa maŋŋá álgá fas hušša

Mátkeealáhusas Eanodagas vurdet stuorra doaivagiin girdinjohtalusa álgima fas mánobaji geahčen.

mies lennnonjohtotornissa, puunainen pipo päässä
Eanodaga girdinstašuvnna hoavda Marko Halla álggahii dán barggus geassemánus 2021. Govva: Vesa Toppari / Yle

Skábmamánu 22. beaivve seivot fas girdimátkkošteaddjit Eanodaga girdingieddái. Dan čuvvot lagabui čuođi mašiinna, eanaš oassi dain leat Boeing 737-800 málle stuoruhat, main lea sadji sullii 180 olbmui.

Girdinstašuvnna hoavda Marko Halla lea rehkenastán ahte dálveguovdilis Eanodagas galledit 17 000 olbmo. Dat lea beanta imaš, go geahčada ávdin gietti dál golggotmánus. Ovddit geardde mátkkošteaddjigirdi seivvodii Eanodagas jagis 2018.

– Skábmamánus seivot golbma mašiinna, juovlamánus lea eanemus johtalus, olles 71 mašiinna dálá dieđu mielde. Vel ođđajagimánus ja guovvamánus 2022 bohtet ain 2–3 chartergirdi vahkkosaččat. Buot dáid girddihit mátkefitnodagat Canterbury ja Transun Brihttalaš sulluin, muitala Marko Halla.

Girdinstašuvnna hoavda orro leamen luohttevaš dainna ahte buot lea válmmaš dalle go mátkkálaččat boahtigohtet. Songe goittot diehtá ahte ii giige boađe girdingietti dihte, baicce eará vásáhusaid dihte Eanodahkii. Oassi dáin fitnet beaivemáhciid ja muhtimat ádjánit golbma dahje njeallje ija.

Go girdingieddi doaibmá, de dat addá vejolašvuođaid fitnodagaide

Okta, guhte áiggeájanasa ja vásihusaid turisttaide Eanodagas fállá, lea fitnodatdoalli Samuli Näkkälä. Son lea hui duđavaš dainna, go Eanodaga girdingieddi lea fas doaimmas. Gihttel girdingieddi lea eandalii beaivemátkkálaččaide menddo guhkkin Eanodagas geahčadettiin. Sus vuhtto dál sihke doaivva ja várrugasvuohta.

mies ulkona karvalakki päässä
Samuli Näkkälä fállá turisttaide meahccevásáhusaid Eanodagas. Govva: Vesa Toppari / Yle

– Livččiihan dat fiinna ášši ahte mii fidnet gussiid fas deikke Eanodahkii go mannan dálvvi lei jaskat. Ammal juo girdingieddi doaibmagoahtá, vaikko dan oamastage dál gielda. Miige ii oro sihkkar ovdalgo oaidná vuosttas mašiinna seaivumin ja maŋimučča loktaneamen, smiehtada Näkkälä.

Samuli Näkkälä fitnodat geaseha turisttaid muohtaskohteriin, reahkasáhtuin meahcis. Mátkái gullet dolastallan, máinnasteapmi ja de vaikko juoiggasteapmige muhtumin.

– Galhan dás lea buoremus álgit reagaid ordnet, jálásiid divodit, go geassit ii leat geargan dahje fuomášan dan dahkat. Ja boaldinmuoraid gal maid dárbbaša barttain ja dollasajiin, árvala Näkkälä.

Gielda oamasta dál sihke girdingietti ja dan fuolahanrusttegiid

Girdingietti ovddit oamasteaddji Finavia ja Eanodaga gielda vuolláičálle mannan jagi skábmamánus gávppi, man mielde girdingieddi ja dan fuolahanrusttegat, ovdamearkan muohtaboltunmašiinnat, sirdašuvve suoidnemánus 2021 Eanodaga gildii.

Enontekiön lentoaseman rakennus jossa lennonjohtotorni
Eanodaga girdingietti oanádus riikkaidgaskasaš áibmojohtalusvuogádagas lea ENF. Govva: Vesa Toppari / Yle

Girdingieddefitnodat lea juogaduvvon guoktin oasussearvin, ENF POP Oy ja ENF Infra Oy. Nubbi fuolaha girdinvuoruin ja nubbi nu daddjon infrastruktuvrras, nugo giettis ja visttiin. Guktui fitnodagaid doaimmahushoavda lea Marko Halla.

Go mátkkoštansesoŋŋa lea alimusas juovlamánus, de fállá girdingieddi barggu sullii 35 olbmui.

Dál Eanodaga girdingiettis besset vel ráfis iskkadit ahte buot doaibmá, seivvodangiettis gitta mátkkošteaddjiterminálii. Muohtaboltun ja girdinmašiinnaid lahkonanmihtideamit gullet dáid beivviid doaimmaide, dadjá girdinstašuvnna hoavda Marko Halla.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä