Sápmi |

Dánsun lea dolvon sápmelaš jumežiid Dálvadasas gitta Brysselii

Birit ja Katja Haarla, 19, johtiba čuovvovažžat Brysselii, Belgiai stuđeret dáládánsuma.

Birit Haarla, Katja Haarla
Birit ja Katja Haarlaa tanssi on vienyt Suomen päästä päähän. Govva: Linda Tammela / Yle

HELSSET Čáhppes liidni rahpasa, beljiide čuodjá ođđalágan musihka. Guokte nuorra nissona lávkeba lávddi ala, eahpesihkkarvuohta gal ii dihtto, ii eisege.

Orru dattege, dego lávddi alde livččii okta olmmoš, njeallje gieđa ja njeallje juolggi. Lihkastagat dáhpáhuvvet nu oktanaga, ahte geahčči gal ferte juo čalmmiid ruvvet.

Dát báiki lea Suoma Našunálaopera ja -baleahta baleahtaoahppolágádus. Čájáhus lea oahppolágádusa giđđafeasta. Lávddi alde elegánta vugiin lihkastalli dánsut leaba 19-jahkásaš sápmelaš jumežat, Birit ja Katja Haarla. Soai fárriiga oktan bearrášiin moadde jagi dassái Suoma oaivegávpogii, Helssegii, namalassii baleahta dihtii. Soai leaba eret Dálvadasas, Deatnogáttis.

Dálvadassii, duoddariid sallii ja vilda Deanu gáddái lea dáppe, Suoma Nášunálaoperas 1283 kilomehtera mátki.

Birit Haarla, Katja Haarla
Govva: Linda Tammela / Yle

Jahkeduhát molsašuvai aiddo ovdal nieidda guoktá riegádeami. Birit vuos, Katja diibmobeali su máŋis. Árabuš mánnávuođas soai oruiga Helssegis, Nummisis ja Ohcejogas. Muhto go skuvlaahki lahkonii, mearridii bearaš fárret oalát davás, Outi-eatni ruovttugilážii Dálvadassii Sápmái. Doppe nieiddat beasaiga álggahit skuvlabálgá sámegielat birrasis, sámeoahpahusas.

Video: median oletuskuva, musta laatikko
Birit ja Katja Haarla tanssivat Marja Helanderin palkitussa Eatnanvuloš lottit - Maan sisällä linnut -lyhytelokuvassa.

Vaikke Dálvadas leage dušše moatti dálu giláš Deatnogáttis, de nieiddaide gal gávdno searvi ja dáhkamuš.

– Mii stoagaimet olles áigge olgun, lei friddjávuohta ja olu friddjaáigi maid, muittaša Birit Haarla.

Birit Haarla, Katja Haarla
Govva: Linda Tammela / Yle

Skihpára ánssus soai gávnnaiga dánsuma, go son hohkahii jumežiid fárrui hárjehallat Kárášjohkii, čieža miilla geahčái. Dáládánsuma lassin skuvllas fállojuvvo dušše baleahta, mii oažžu nieidda guoktá smiehtastit joatkaga. Muhto dieđusge soai mearrideaba joatkit.

– Álggos smiehtaime, ahte ean leat nu beroštuvvan baleahtas. Muhto mearrideimme iskkat ja fuomášeimme, ahte dathan leage hástaleaddji ja danin nu erenoamáš somá, Katja muitala.

Luomuid áigge soai finaiga intensiivakurssain ovdamearkka dihtii Helssegis ja Kuopios, maŋŋeleappos maid Eurohpás. Go oruiga vel davvin, leigga soai fárus Baleahtaoahppolágádusa erenoamášskuvlenjoavkkus.

Birit Haarla, Katja Haarla
Govva: Linda Tammela / Yle

Badjedássái sirdašuvadettiin bearaš fárrii ruovttoluotta Helssegii. Nieiddat vázziiga skuvlla Kruununhakas, luomuid soai leigga aktiivvalaččat iešguđetlágan leairrain.

De rahpasedje uvssat Nášunalabaleahta baleahtaoahppolágádusa nuoraid hárjehallanjovkui. Dan joavkkus beassá skuvlla ámmátlaš skuvlejupmái – jus beassá. Garra hárjehallama ánssus soai lihkostuvaiga beassat sisa ámmátlaš skuvlejupmái jagis 2016.

Birit Haarla, Katja Haarla
Govva: Linda Tammela / Yle

Lihkastat joatkašuvvá, fas guokte lea dego okta.

– Galhan dat lea áibba eará ášši dánsut olbmuin, gean dovdá nu bures, geainna lea leamaš ovttas olles eallima.

Ja dat maid veahkeha dánsumis. Leahan dat gal oba lunddolašge: go nuppi dovdá juohke seala miel, máhttá juo dulkot, goas gieđat rámškalit oktii ja goas juolgi vuolgá čuovvovaš lávkái.

Birit Haarla, Katja Haarla
Govva: Linda Tammela / Yle

– Lea olu álkit oažžut fysalaš kontávtta nubbái, soai lohkaba go ovtta njálmmis smiehtadettiin ideanttalašvuođa ávkkiid dánsumis.

Dat, maid ideanttalašvuohta duođai mearkkaša, šaddá konkreahttan, go jumežiid oaidná lávddi alde.

Soai gal sihkkarit návddašeaba, dan gullá ja dan oaidná.

– Dánsuma bokte beassá áibbas eará máilbmái. Dat veahkeha maid gieđahallat váttis dovdduid, govvida Katja Haarla.

– Dán giđa áigge dánsun lea leamaš hirbmat somá, muhto maiddái vehá morašlaš, go okta muddu eallimis nohká.

Video: median oletuskuva, musta laatikko
Birit ja Katja Haarla harjoittelemassa nykytanssiteosta nimeltään Dreams of a Wasteland. Teoksen taustalla on ranskalainen tanssija-koreografi Thibault Monnier.

Našunálabaleahta lávddis lea dáládánsunčájáhus Dreams of a Wasteland. Dat lea fránskalaš dánsu-koreográfa Thibault Monniera buvtta. Čájáhus lea maŋimuš čájáhus dáppe ovdamearkka dihtii Haarla guoktái, geat leaba dál gárvásat dán skuvllas.

Golmma jagi garra bargu Helssegis lea meaddel. Dasa lassin, ahte soai leaba čađahan dánsu ámmátdutkosa, leaba soai čállán studeantan Eira rávesolbmuidlogahagas. Nu gohčoduvvon duppaldutkus lea bálkášupmi viššalis barggus logahagas ja čuđiin dánsundiimmuin.

Dál Birit ja Katja geahčadeaba Eurohpa guvlui. Duháhiid ohcciid joavkkus soai guktot válljejuvvuiga Brysselii, Belgiai stuđeret dáládánsunskuvlla P.A.R.T.S:ii (Performing Arts Research and Training Studios).

Lasi, lasi, lasi, lasi. Nie jumežat govvideaba dan dovddu, go háliideaba dušše beare dánsut.

Varrasamosat: Sápmi

Váldoođđasat

Varrasamosat

Muualla Yle.fi:ssä