Sápmi |

"Dáppe ii leat áidi artisttaid ja guldaleddjiid gaskkas" – Gájanas vuosttas geardde Kaustinen álbmotmusihkkafestiválas

Davvisuopmelaš musihkkajoavku Gájanas loaiddastii Kaustinen álbmotmusihkkafestivála váldolávddiin maŋŋebárgga ja gaskavahku. Oassálastin festiválii lei Gájanas-musihkkáriidda vuosttas geardi.

Gájanas Kaustisten kansanmusiikkifestivaalilla heinäkuussa 2017
Govva: Helga West / Yle

Geassit uhca giláš, Kaustinen, Gaska-Bađaeatnamis, šaddá álbmotmusihkkaguovddáš vahku áigái, go Kaustinen álbmotmusihkkafestivála álgá suoidnemánu gaskkamuttus. Vuossárgga álgán festivála deavdá dán jagi 50 jagi. Árbevirolaččat maid sámeartisttat ja joavkkut leat leamašan mielde musihkkadoaluin. Dán jagi Gájanas-musihkkajoavku beasai čájehit iežas modearna sámešuoŋaid.

Gájanas-musihkkajoavku válljejuvvui Jagi musihkkajoavkun. Lágideaddji Pro Kaustinen ry -searvi háliida dainna gudnejahttit sámemusihka ja nannet sámeárbevieruid. Gájanas čuojaha rock-stiilasaš musihka, mas gullo luohteárbevierru.

Hildá Länsmanas persovnnalaš čanastagat Kaustisii

Gájanas loaiddastii váldolávddiin maŋŋebárgga ja gaskavahku. Oassálastin festiválii lei Gájanas-musihkkáriidda ja lávlui Hildá Länsmannii vuosttas geardi. Länsmanas leat persovnnalaš čanastagat Kaustisiin.

– 16-jahkásažžan mun bohten deike studeret musihkkalogahahkii, ja mun gergen leat bealle jagi, muhto de kánske šattai ruoktoahkit, go dás lea goittot 900 kilomehtera gaskkas, nu dasto mun máhccen ruovttoluotta Ohcejohkii, muitala Länsman, mo šattai oahpisin Kaustisiin.

Son lohká lea leamašan somá deaivat boares logahat skihpáriid ja dálá skuvlaskihpáriid Helssega Sibelius-Akademiijas, gos son dál studere. 

Álbmotmusihkka gullo juohke nurkke duohken birra jándora

Kaustinen álbmotmusihkkafestivála prográmma guovddážis leat báikkálaš ja riikkadási álbmotmusihkkárat ja beakkán, suopmelaš násttit. Daid lassin riikkaidgaskasaš musihkkárat, lávlut ja dánsut oassálasttet dán jagi 25 sierra riikkas. Oktiibuot iehčanas musihkkadáhpáhusat dán vahku áigge leat badjel 1500.

Kaustisten kansanmusiikkifestivaalilla heinäkuussa 2017
Govva: Helga West / Yle

Gájanas-jovkui vásáhus lea leamašan áidnalunddot, go álbmotmusihkka čuodjá iđidis gitta idjii juohke nurkke duohken.

– Dát lea issoras fiinna festivála, go dáppe ii leat makkárge áidi artisttaid ja guldaleddjiid gaskkas, smiehtasta Nicholas Francett, joavkku gitárra- ja selločuojaheaddji.

Ovtta oaivilis lea Nicholasa viellja, Kevin Francett, gii čuojaha rumbbuid.

– Lea leamašan nu suohtas musiseret spontánalaččat earáiguin, ja go olbmot váldet nu gulul dáppe, na buohkat leat vuolgán fárrui dakkaviđe, muitala Kevin Francett iežas vásáhusa birra.

Gájanas čuojahii golbmii vahku áigge, ja eanemus bássačuojaheaddji Erkki Feodoroff vurddii maŋimuš konseartta, mii lei gaskavahku eahkedis.

– Dát min eahketkonsearta lea min konsearttain guhkimus, ja go dat lea eahkedis, olbmot leat mielde eanet, vaikko gal beaivitge guldaleaddjit ledje olu, muhto beaivit olbmot eai liikká leat nu stuorra váimmuin mielde, oaivvilda Feodoroff.

"Das lei nissonfápmu ollu"

Gájanasa eahketkonsearta geasuhii tealttá dievva guldaleddjiid, ja máŋgasat dánso ja čielgasit čájehedje beroštumi nuorra musihkkajoavkku ektui. Guokte sis leigga oappážat Leena-Marianne ja Anjuli Pullinen, geaidda Gájanas ii lean ovddalgihtii oahpis. Soai illudeigga, go deaivvaiga sin konsertii, ja livččiiga gergosat maŋŋelabbosge guldalit sin eambbo.

Anjuli ja Leena-Marianne Pullinen
oappážat Leena-Marianne ja Anjuli Pullinen Govva: Helga West / Yle

– Dat lei hui čáppa. Das gullui oktavuohta lundui ja das lei nissonfápmu ollu. Lei fiinnis oaidnit, ahte dat lávlu, nuorra nissonolmmoš, lei iežas fámuid siste lávllodettiin iežas gillii, govvida Leena-Marianne Pullinen konseartavásáhusa.

Anjuli Pullinen lohká sámemusihkka heivet bures Kaustinen álbmotmusihkkafestiválii.

– Áibbas čielgasit sámemusihkka lea álbmotmusihkka, mii badjána doppe álbmogis, ja das gullo, ahte das leat guhkes árbevierut, jurdila Anjuli Pullinen.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä