Sápmi |

Dárbbašatgo rávvagiid áidebargguide? – Yhdessä eloa -fidnu čohkke rávvagiid boazobargguin

Fidnus leat mielde njeallje bálgosa, muhto oktage dain ii leat Sámi bálggus.

Jietna: Iida Melamies
Jietna
Guldal Iida Melamies jearahallama dás.

Lappi ámmátallaskuvla ja Davvi-Suoma EJB-guovddáš álggahii dán jagi álggus Yhdessä eloa -nammasaš fidnu, man ulbmilin lea ovddidit ja buoridit badjeolbmuid bargoburesveadjima ja bargodorvvolašvuođa bálgosiid bargguin.

Fidnu olis čohkkejit maiddái rávvagiid boazobargguin, maid juhket de badjeolbmuide. Sii ohcet rávvagiid áibba geavatlaš bargguin, dego mo gánneha ovdamearka dihte verráha ráhkadit boazoáidái.

– Daid rávvagiid mii prentet gihppagin, ja sihkkarit maiddái almmustahttit Poromies-bláđis muhtinlágan čoahkkáigeasu dain rávvagiin. Mii mielas juohkit daid buohkaide, ja dieđusge livčče maid buorre, ahte dat livčče maiddái boazodoalu oahpahusgeavahusas, muitala prošeaktaplánejeaddji Iida Melamies.

Yhdessä eloa -fidnu
Prošeaktaplánejeaddji Iida Melamies johtá ovdal suoidnemánu miessemearkumiin. Govva: Yhdessä eloa -fidnu

Melamies bivdáge olbmuid juohkit singuin iežaset dieđuid ja dáidduid, muhto dan lassin sii háliidit gullat badjeolbmuid jurdagiid boazobargguin iežaset bálgosiin.

– Dan fidnus mii ieža mannat badjeolbmuid lusa ja sii ožžot ieža muitalit iežaset áššiin ja ohcat čovdosiid váttisvuođaide. Mii eat daja mo galgá dahje mo ii galgga, baicca mii leat mielde doarjumen ja veahkeheamen. Dange dihte lea dehálaš, ahte jus boahtá mii nu millii, de váldá midjiide oktavuođa.

Fidnus mielde 4 bálgosa – Sámi bálgosat eai leat mielde

Yhdessä eloa -fidnus leat mielde njeallje nu gohčoduvvon pilohtabálgosa. Pilohtabálgosat leat Syväjärvi, Oraniemi, Salla ja Palojärvi, nappo fidnus ii leat oktage sámeguovllu bálggus.

Bálgosiid boazoisidat ožžo ieža dieđihit bálgosiiddaset fárrui fidnui. Fidnus dieđihedje njuolga boazoisidiidda, ja maiddái Poromies-bláđis, muitala prošeaktaplánejeaddji.

– Dát fidnu gal juksá maiddái davimus guovllu bálgosiid, muhto váidalahtti gal oktage Sámi guovllu bálggus ii dieđihan dasa mielde. Dieđusge earáge bálgosat báhce das eret, go válddiimet dušše njeallje bálgosa dasa fárrui, čilge Iida Melamies.

Yhdessä eloa -fidnu gávdná Facebookas. Fidnu bistá jagi 2019 lohppii.

Guldal olles jearahallama Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä