Sápmi |

Dát musihkkárat soitet leat boahttevuođas Sámi šerres musihkkanásttit – Sámi musihkkaakademiija solistalinnjá vázzet gávccis

Solistalinnjá ordnejuvvo dál vuosttas háve Ohcejogas Sámi musihkkaakademiijas.

Laura Tapiola juoiggai Niillasaš Jovnna Piera luođi mii heivehuvvui dán oahpahusperiodas barohkamusihkii.
Laura Tapiola juoiggai Niillasaš Jovnna Piera luođi mii heivehuvvui dán oahpahusperiodas barohkkamusihkii. Govva: Kaija Länsman / Yle
ohcejohka

Ohcejogas, Áilegasdálus čudjet luođit, livđet ja leu´ddet, muhto binná eará láhkai masa leat hárjánan. Gávcci oahppi leat galgan heivehit árbevirolaš luđiid barohkkamusihkkii.

Sii leat Sámi musihkkaakademiija solistalinnjá oahppit. Sii leat mannan jagi jo vázzán Sámi musihkkaakademiija vuosttas jagi oahpuid, ja dál sidjiide lea fállun nuppi jagi oahput.

Ohcejohkalaš Laura Tapiola bargá mánáidgárddis ja barggu lassin gazzá dál solistaoahpu.

– Mus bázii vuosttas jagi maŋŋá nu buorre dovdu ja orui ahte bázii gaskan. Musihka lea miellagiddevaš, muitala Tapiola.

Laura Tapiola.
Barohkkamusihkka luođi oktiiheiveheapmi leamašan Tapiola mielas hui speanta ja somá vaikko deaivvadeami áigge oahpahus leage hui intensiiva. Govva: Kaija Länsman / Yle

Heli Aikio lea jo hárjánan musihkkár. Soai ovttas Jessica Lampiin vuittiiga Sámi Grand Prix -lávlunoasi jagis 2014. Aikio háliida ain eanet ovdánit musihkkárin.

– Háliidan rahkadit iežan lávlagiid alccen ja earáide maiddái. Ovttastivččen lávlagiid dahkama ja iežan solistavuođa. Dat lea mu niehku, muitala Aikio.

“Oainnán, ahte mii oažžut olu ođđalágan máhtu ja čehppodaga Sámi musihkkagieddái”

Dássážii Sámi musihkkakademiija lea ordnen vuosttas jagi oahpuid jo golbmii. Dán čavčča álge joatkkaoahput, namalassii solistalinnjá ja nubbin fálaldahkan lea musihkarlinnjá.

Sámi musihkkaakademiija jođiheaddji-oahpaheaddji Anna Näkkäläjärvi-Länsman muitala, ahte solistalinnjálaččat galget studeret olu gáiddusin ja iehčanassii. Dasa lea sivva.

– Oainnán, ahte dat láide oahppiid iehčanas bargui. Musihkkára bargu lea goittotge hui oktonas bargu. Ferte gávdnat dan mii lea guđege čehppodat. Sávan, ahte studeanttat jurddašit dien dán jagi áigge, muitala Näkkäläjärvi-Länsman.

Son oaidná maid boahttevuođa solistalinnjálaččain.

– Doppe lea hui máŋggalágan čehppodat. Mun gal oainnán, ahte mii oažžut olu ođđalágan máhtu ja čehppodaga dán skuvlejumi bokte atnui dan Sámi musihkkagieddái.

Anna Näkkäläjärvi-Länsman lea musihkaakademiija jođiheaddji oahpaheaddji.
Anna Näkkäläjärvi-Länsman sávvá, ahte oarjemáilmmi musihkkamáhttu lassána ja Sámis livčče boahttevuođas iežas musihkaoahpaheaddjit. Govva: Kaija Länsman / Yle

Lohpidit máŋggaid konsearttaid Ohcejohkii ja Anárii

Go oahpahus addojuvvo olu gáiddusin, de deaivvademiid áigge oahpahus lea hui intensiiva. Deaivvademiid oktavuođas lea maid juoga earenomášvuohta. Nu lei mannan vahkuloahpasge.

Oahppit galge doallat konseartta namalassii dan barohkkamusihkka ja luođi ovttasteamis.

Konsearttaid doallan oahpaha oahppiide olu, muitala Tapiola.

– Leahan dat dehálaš, dat veahkeha ja addá dakkár duostilvuođa, smiehtada Tapiola.

– Konseartat oahpahit olu. Mis leamašan ovdal dakkár konsearttat, gos mii ieža leat čuojahan. Dál beassat loaiddastit ámmátmusihkkárjoavkkuin ovttas, joatká Aikio.

Heli Aikio vázzá solistalinjá Sámi musihkaakademiijas.
Aikio lea lávlon viehka guhká, muhto sus ii leat nu olu hárjánupmi čuojahit ja loaiddastit musihkkajoavkkuin. Danne sutnje lei dehálaš beassat hárjehallat ovttas ámmátmusihkkariiguin. Govva: Kaija Länsman / Yle

Jus ii vahkuloahpas beassan gullat barohkka- ja luohtekonseartta, de ii heahti. Máŋggat konsearttat leat boahtimen vel, sihke Ohcejogas ja Anáris, lohpida Näkkäläjärvi-Länsman.

– Nubbi konsearta lea skábmamánus. Dat lea maiddái Ohcejogas ja Anáris. Ja maiddái giđa bealde mii doallat unna konsearttaid.

– Dasto giđa stuorimus dáhpáhus lea dat min loahppakonsearta, dahje solistalinjjálaččaid solokonsearttat dasto dalle miessemánus, lohpida Näkkäläjärvi-Länsman.

Varrasamosat: Sápmi

Váldoođđasat

Varrasamosat

Muualla Yle.fi:ssä