Sápmi |

Dát vahku čájeha dutkiide makkár luossajahki dán jagi šaddá – geahča videos mo skádjaseasanvideos ohcet ja lohket luosaid

Dutkiid mielde dássážii leat gorgŋon eanaš luosjuolggit. Báikkálaš guollebivdi muitala, ahte dán gease ii gal leat bures goddon luossa.

Video: Skádjaseasana govva, mas lohket luosaid.

Deanus Buolbmágis ja Anárjogas leat skádjaseasanat govven johkabotni jo badjel mánotbaji. Skádjaseasanat leat dál nuppi geasi jogain dan várás, ahte oidnet man olu luosat gorgŋot Detnui ja Anárjohkii.

Dán geasi luossajagi oaidná namalassii suoidnemánu vuosttas vahkus, arvala dutki Panu Orell.

– Dássážii orru seammalágan luossajahki go diibmá. 22.6.2019 rádjái ledje gorgŋon vádjit 7000 luosa, muitala Orell.

– Dássážii Buolbmága skádjaseasana meattá vuodjan luosain goalmmádas leamašan dittit. Badjel 90-sentemehter guhku stuorra luosat leamašan vádjit viđádas. Eanemus leat gorgŋon luosjuolggit, čilge Orell.

Diibmá gorgŋo dutkiid mielde badjel 32 000 luosa Detnui ja Anárjohkii vádjit 3000 luosa. Diibmá Detnui gorgŋo eanemus luosat namalassii 29.6.2018.

– Dál eallit dan áiggi goas Detnui galggašedje goargŋut eanemus luosat. Dittit maid galggašedje goargŋugoahtit dál. Suoidnemánu vuosttas váhku lea deháleamos vahku luossagoargŋumis.

Deanus vulge jieŋat dán giđa earenomáš árrat. Dat ii dutkiid mielas váikkut nu olu luosaid goargŋumii.

– Sihkkarit muhtun veardde luosat gerge goargŋut ovdal go mii oaččuimet skádjaseasaniid johkii 22.5.2019. Dan maŋŋá sullii čuohte luosa beaivvis vudje skádjaseasana meattá.

Skádjaseasan ii leat makkárge automáhtalaš mihttár, mii coahkeha go guolli vuodjá meattá

Ohcejogas LUKE Deanu dutkanstašuvnnas almmái čohkká sevdnjes lánjas ja dutkkada dihtoršearpmas čáhppesvilges gova. Dan govas galgá áicat vilgesčuoggáin mii lea luossa. Dan maŋŋá unna vilges čuoggá sirdá alit šerbmii ja dasto gova lihkahallamin oaidná vuodjágo guolli vulos vai bajás. Dan maŋŋá guoli sáhttá mihtidit ja árvalit guhkkodaga vuođul leago dat diddi, luosjuolgi vai vaikkoba goadjin.

– Skádjaseasan govve birra jándora olles geasi. Dat lea olmmoš, guhte ohcá govas guliid. Danin logut eai beaiváduvvo seammás neahttasiidduide.

Luondduriggodatguovddáš (LUKE) lea ođadeamen neahttasiidduidis. Dohko lea jurddan bidjat dán geasi maiddái čázevuloš njuolggogova Deanus, mas olbmot besset geahččat oidnojitgo luosat. Gosa kámera biddjojuvvo, dan eai muital.

Aslak Pieski
Ásllat Pieski mielas Deatnu leamaš dál ijaid áigge seamma ávdin, go 60-logu loahpas. Govva: Laura Pieski / Yle

"Deatnu seamma ávdin ihkku, go 60-logu loahpas"

Ohcejohkalaš guollebivdi Ásllat Pieski muitala, ahte dán gease ii gal leat bures goddon guolli. Son muitala geasi leat leamaš olu heajut go mannan geassi lei.

– Mannan gease dadje ahte lei hui fuotni, muhto dál golgadeapmi goit manai olu fuonit, iige oaggunge leat buktán maidege.

Son lea gal sugadettiin oaidnán stuorrage guliid guovlladeamen, muhto dattege ii leat dohppen.

– Ammal dat leat vel nu fárttain mannamen, ahte eai orus ja dohppe.

Pieski muitala, ahte guliid gal lávejit gottášit duollet dállet, muhto eanáš beaivit go turisttat oggot. Ihkku lea Deatnu viehka ávdin, jurdila son.

– Mun smihtten dat Deatnu lea seamma ávdin ihkku, go dalle 60-vuođđologu loahpas, go ledjen nuorra gánda ja lávejin oaggut. Muhtumin bessen leat áibba okto, obba ija suhkat. Dál lea seamma dilli.

Diehtuge ii leat šat dien láhkái fidnemis, ahte masa guolli dohppe. Ovdal go ledje olu suhkkit, de turisttat lávejedje almmuhit sosiála medias masa guolit leat dohppen, muitala Pieski.

– Dál eai oidno diet muitaleamen, de ii beasa ávkkástallat duihmige guolásteaddji daid earáid dieđuiguin.

Dás sáhtát guldalit, maid Ásllat Pieski muitala Deanu luossabivddu birra. Jietna: Yle Areena.

Varrasamosat: Sápmi

Váldoođđasat

Varrasamosat

Muualla Yle.fi:ssä