Sápmi |

Davvi-Dakotas jođus ain dáistaleamit oljobohcci huksema vuostá

Davvi-Dakotas, Amerihkás leat ain jođus dáistaleamit Dakota Access Pipeline -oljobohcci huksema vuostá. Guovllus leat leamaš stuorra miellačájahusat, maid dorjot sosiála medias.

Öljypumppu Pohjois-Dakotassa.
Öljypumppu Pohjois-Dakotassa. Govva: Karen Bleier / AFP / Lehtikuva

Davvi-Dakotas, Amerihkás leat ain jođus dáistaleamit Dakota Access Pipeline -oljobohcci huksema vuostá.

Bohcci galgá huksejuvvot reserváhta váldočáhcegálddu vuolil. Huksenfitnodat lea dihtomielalaččat jávistan bassi báikkiid ja máttuid hávddiid guoivunmášeniiguin.

Davvi-Dakota dili birra bohte olu dieđut, main leat iešguđetlágan dieđut sierra gáldduin.

Stuorra miellačájahus mannan lávvordaga

CBS Minnesota ođassiiddus muitalit, ahte oljobohcci bargoeatnama lahka ordnejuvvui stuorra miellačájáhus mannan lávvordaga. Miellačájáhussii válddii oasi badjel 300 olbmo.

Morton County bolesdoaimmahaga ságadoalli Rob Keller lea dadjan CBS Minnesotai, ahte guovllu boles lei bovdejuvvon báikki ala iđđesárrat.

Lávvordatiđđes dáhpáhuvvan virgeolbmuid ja miellačájeheddjiid gaskasaš stuimmit biste olles vihtta diimmu.

Oktiibuot 269 olbmo váldon gitta

Proteasttat leat buktán guvlui duháhiid olbmuid vuostálastit oljobohcci huksema. Morton County bolesa maŋimuš dieđuid mielde gitta leat váldon dál oktiibuot 269 olbmo dan rájes go miellačájáhusat álget guovvamánu álggus. Sin joavkkus leat álgoálbmotolbmuid lassin earret eará neavttárat ja journalisttatge.

Mannan vahkuloahpa stuimmiid dihte gitta válde 127 miellačájeheaddji.

Morton County boles: lágaheapme, váralaš dagut

Dál Morton County boles čállá Facebook-siidduinis, ahte protesterejeaddjit jotket lágahis taktihkkaid ja dieinnalágiin riskerejit bolesiid ja guovllu ássiid dili.

Bolesa dieđáhusa mielde sotnabeaivve aktivisttat ovdamearkka dihte fallehedje helikoptera vuostá, go sii báhče njuolaid dasa. Sii maiddái ráhkadedje easttaga geainnu ala lobi haga.

Boles leage gártan jearrat veahki eará guovlluid bolesiin.

Sosiála media lea olles áigge mielde

Davvi-Dakota dáhpáhusain lea earenoamaš dat, ahte dat leat oidnosis olu sosiála medias.

Olbmot juhket dieđuid oljobohcci huksemis ja miellačájáhusain, ja geahččalit maid ná váikkuhit áššiide, ja oažžut daid oidnosii. Ovdamearkka dihtii Amerihka iežas mediat leat oalle unnán čállán ášši birra, muhto sosiála media fámu sáhttá gal čielgasit oaidnit.

linkkat

twitterlinkka

Twitter

“Válljetgo ruđa, vuoi válljetgo mánáid? Válljetgo diehtemeahttunvuođa, vuoi válljetgo ráhkisvuođa?” - neavttár Shailene Woodley.

Varrasamosat: Sápmi

Váldoođđasat

Varrasamosat

Muualla Yle.fi:ssä