Sápmi |

Davvi-Suomas báikkálaččat leat dolkan, go mearrideaddjit eai gula sin jiena

Ohcejohkalaččat čoahkkanedje lávvardaga 19.6. čájehit oaivileaset ođđa guolástanlága vuostá Ohcejoga Máttatguoikka gáddái. Dálá mearrádusaid mielde báikki olbmot eai oaččo šat bivdit friddja Deanu siidojogain.

Utsjoen mielenosoitus kalastuslakia vastaan
Govva: Mikkal Morottaja / Yle

Máŋga logi olbmo čoahkkanedje Ohcejoga Máttatguikii oaivilastit ja oassi maiddái guolástit lobi haga. Esa Karpoff lea sosiála medias ávžžuhan olbmuid searvat oaivilastimii. Son dadjá, ahte stáhtaváldi dahká mearrádusaid árvvoštalakeahttá áššiid doarvái.

– Doppe dahket mearrádusaid maid čuovvumušaid eai dovdda. Dál mii iskat dainna dáhpáhusain váikkuhit dasa, ahte mii oaččošeimmet guolástit iežamet jogain, muitala Karpoff oaivilastima birra.

Esa Karpoff
Govva: Mikkal Morottaja / Yle

"Ii leat áidna vuohki váikkuhit"

Báikkálaččat leat dolkan, go mearrideaddjit eai gula sin jiena. Danin oaivilastin orru leamen konkrehtalaš vuohki váikkuhit.

– Ii dát áidna vuohki leat, muhto dál orru leamen nu, ahte jietna ii mana čađa ovdalgo mannat hui garrasit, eaige buot áššiid oba guldaluvvo. Lea boahtán dakkár navddus, ahte máddin dihtet buot áššiid dáppe, muhto dathan ii nu leat.

"Hirbmat olu dolvon"

Aarne Sujala
Govva: Mikkal Morottaja / Yle
Unna gilis lei báikki ala boahtán mealgat joavku. Guolásteapmi leage dehálaš oassi kultuvrra. Aarne Sujala lea guolástan olles eallinagis.

– Mun lean farga 70-jahkásaš ja áibbas smávva gándan álgán guoli bivdit ja leamaš guollebivddus fárus. Dat lea hirbmat olu maid leat dolvon, nugo lea dolin dolvon sámegiella maiddái, oaivvilda Sujala.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä