Sápmi

Davvi-Suomas skuvlejit lasi bargiid koronavirustestemii – ovtta girdi mátkkošteddjiid testemii dárbbašit juobe 15 bargi

Video: Koronatestaus Ivalossa
Guhkes testensággi finasta goappáge njunneráiggis. Dál skuvlegohtetge lasi sihke testejeddjiid ja sidjiide vehkiid. Video: Yle Areena

Anáris koronatestejeaddjiid ja vehkiid skuvlejit skábmamánu loahpas.

Guhkes vilges testensággi finasta goappáge njunneráiggis. Nie váldet jođánis koronavirusteastta ja dat leage šaddan máŋgasiidda oahpisin dál koronavirusáigge. Ieš pasieanttas ii guhká koronavirustestemis mana, muhto testejeaddjis ja su veahkis lea olu bargu sihke ovdal testema ja dan maŋŋá.

Testen leage ođđa resursaborri, man koronavirus lea buktán.

– Dat lea čielggas, ahte dát lea boahtán dábálaš doaimma ala. Mii leat basttán rekryteret muhtin oktasaš lassiresurssaid, muhto bargofápmu ii olus leat fállun ja danin dárbbašit lassigieđaid dása mielde, muitala Anára gieldda sosiála- ja dearvvašvuođahoavda Jaakko Seppänen.

Sosiaali- ja terveysjohtaja Jaakko Seppänen.
Anára gieldda sosiála- ja dearvvašvuođahoavda Jaakko Seppänen muitala, ahte Anáris váldet beaivválaččat sullii 40-50 jođánis koronavirusteastta. Govva: Vesa Toppari / Yle

Skuvlejumi plánejedje mátkkošteami váras

Sihke Anáris ja Roavvenjárggas skuvlegohtet lasi olbmuid váldit jođánis teasttaid. Ulbmilin lea maiddái skuvlet testejeddjiide vehkiid. Redu Edu Oy lea ordneme skuvlema ja das leat mielde Anára gieldda ja Roavenjárgga gávpoga lassin maiddái earret eará Lappi EBI-guovddáš ruhtadeaddjin ja BE-guovddáš. Skuvlema plánegohte álgoálggus mátkkošteami váras.

– Okta jurdda dán skuvlejupmái lea leamašan dat, ahte dego mis rahpasa mátkkošteapmi, de ovtta girdi mátkkošteddjiid testemii dárbbašuvvo sullii 15 olbmo testenjoavku , muitala Kari Rekilä Redu Edu Oy beaivválašjođiheaddji.

Kari Rekilä.
Redu Edu Oy beaivválaš jođiheaddji Kari Rekilä muitala, ahte skuvlema plánejedje mátkeealáhusa doarjjan. Govva: Antti Mikkola

Mátkkošteami rahpamis leat hupman olles čavčča ja plánat rivdet olles áigge. Dál eai bálljo olgoriika mátkkošteaddjit Supmii boađe, muhto goassege ii dieđe goas dilli rievdá. Jus mátkkošteapmi livččii juste dál fas jorragoahtán, nu dat gáibidivččii Anáris priváhta doaibmi veahkkin.

– Gal dat gáibidivččii min dáhpáhusas man nu priváhta doaibmi mielde. Duháhat olbmot boađáše vahkkus ja dat lea stuorra mearri, muitala Seppänen.

Dál go olbmot eai olus jođe, de Anáris váldet beaivválaččat sullii 40-50 koronavirusteastta. Seppänen árvala, ahte lohku šaddá guovttegeardásažžan go ruovtturiika mátkkošteaddjit johtigohtet. Dalle maiddái lassigieđaide lea dárbu dearvvašvuođaguovddáža testemis.

– Gal testenhyhttas šaddá hušša, go ruovtturiikkalaš mátkkošteaddjit johtigohtet, árvala Seppänen.

Anára skuvlejupmái lea vel vejolaš ohcat

Logi beaivve bistti skuvlejumi leat álggahan jo Roavvenjárggas. Anáris testejeddjiid ja testejeaddji vehkkiid skuvlegohtet skábmamánu loahpas. Skuvlejupmái lea vel vejolaš ohcat skábmamánu 22. beaivve rádjai.

Skuvlen lea bargofápmoskuvlejupmi, man ordnejit sihke gáiddus- ja lagašoahpahussan. Testejeaddjin ohcet olbmuid, geain lea dearvvašvuođasuorggi skuvlejupmi dahje sii studerejit suorggi. Testejeaddji veahkkin fas ohcet áššehasbálvalanvuoiŋŋat olbmuid.

Anáris sávvet, ahte basttáše skuvlet oktiibuot 20 ođđa testenbargi: logi testejeaddji ja logi testejeaddji veahkki. Dainna bastetge ovddalgihtii sihkkarastit, ahte bargoveahka gávdno, jus ovdamearka dihte njoammunáitagiid dihte gártet muhtin bargit báhcit eret.

– Dál mii geargat dasa reageret. Jus mii oččošeimmet váikko logi testejeaddji lasi ja vel vehkiid maid , de dat álkidahttá dili. Dalle mii sáhttit addit iežamet joavkku bosihit ja sáhttit goittotge vástidit vejolaš resursadárbbuide girdigiettis, dadjá Jaakko Seppänen.

Varrasamosat

Muualla Yle.fi:ssä