Sápmi

Davviguovllu gávppiid dálkkasskáhpet masá guorranan – Avvila apotehkas leamaš hušša koronavirusa dihte

Pirkko Rajaluoto
Anára girkosiidda áidna dálkkasskáhpe guorranišgođii álgovahkus. Gávpejas Pirkko Rajaluoto muitala, ahte dálkasiid vuovdimii leat biddjon ráddjehusat. Govva: Vesa Toppari / Yle

Suopma ráddje dálkasiid vuovdima vai dat reahkkájit daidda, geat daid dárbbašit.

Avvila apotehkas leat dán vahkus uvssat rahpasan divdna. Go okta čákŋala olggos, de lea juo čuovvovaš boahtimen sisa. Suoma ráđđehus almmuhii dán vahkus, ahte koronavirusa dagahan spiehkastatdili dihte ráddjegohtet dálkasiid vuovdima.

Dan maŋŋá Avvila apotehkas leage leamašan oalle hušša. Dábálaš dálkkasvuovdima lassin apotehka doaimmaha dálkasiid ovddosguvlui davás, Njávdáma, Ohcejoga ja Anára girkosiidda gávppiide.

Njellimlaš Heimo Pukkila finada apotehkas dalle go lea dárbu. Son ii goit vel bala das, ahte dálkasat nohket.

– In leat leamaš fuolas. Galggan fitnat dáppe álo duollet dálle, go dárbbašan dálkasiid, muhto in jáhke, ahte dan dihte šaddet váttisvuođat, smiehtada Pukkila.

Nellimiläinen Heimo Pukkila
Njellimlaš Heimo Pukkila finai dálkkasviežžantuvrras duorastaga. Govva: Vesa Toppari / Yle

Ivalon apteekki
Avvila apotehkas ilduin leat velá ollu buktagat, maiguid sáhttá iežas dálkkodit jus buohccá. Govva: Vesa Toppari / Yle

Giligávppiid apotehkat vurdet juo lasi dálkasiid

Koronavirusa dihte olbmot leat ráhkkanišgoahtán dasa, ahte ruovttus leat doarvái biebmu ja dálkasat. Álggos gávppiin nohke desinfierenávdnasat, dasto hivssetbábir ja dál olbmuin lea fuolla dálkasiin.

Dálkkasvátni vuhtto eandaliige davvin giligávppiid vuorkkáin. Anára girkosiidda gávppiin lea okta dálkkasskáhpe, mii lea guorranan dáid beivviid go olbmot leat nu áŋgirit viežžan dálkasiid febera vuolideapmái ja bákčasiid váidudeapmái.

– Min dálkkasskáhppe lea masá guorus. Bávččasdálkasat ja sullasaččat eai leat šat, muhto apotehkas leat lohpidan doaimmahit midjiide lasi dálkasiid nu jođánit go vejolaš, dadjá anárlaš gávpejas Pirkko Rajaluoto.

Bálvalanbáikkiin leat ferten bidjat rádjehušaid dálkasiid vuovdimii.

– Mis leat ráddjehusat, nappo dušše okta buvtta ovtta kundarii, muitala Rajaluoto.

Apotehka oamasteaddji: Figgat doaimmahit dálkasiid nu jođánit go vejolaš

Apotehka oamasteajji Risto Ropponen čilge, ahte dálkasat eai leat nohkamin, vaikko dál dain leamaš vátni muhtin gávppiin.

– Mis leat sierra bálvalančuoggát Sámis. Go gávpejasat diŋgojit dohko dálkasiid, mii figgat doaimmahit daid nu jođánit go vejolaš dan mielde, mo dálkasat leat oažžumis. Dán muttus dilli lea áibbas buorre, muitala Ropponen.

Ivalon apteekkari Risto Ropponen
Apotehka oamasteaddji Risto Ropponen jáhká dálkkasiid reahkkát buohkaide. Govva: Vesa Toppari / Yle

Ivalon apteekki
Dáid beivviid áigge Avvila apotehkas leat fitnan olu olbmot. Govva: Vesa Toppari / Yle

Apotehka oamasteaddji muitala, ahte bivnnuhamos mearkkat ovdamearka dihte parasetamoldálkasiin nohket jođánit.

– Nohkan dálkasiid sadjái gávdnojit seammasullasaš dálkasat. Muhtin dálkasiin sáhttá šaddat vátni, muhto muđuid mis lea buorre dilli, čilge Ropponen.

Avvila apotehka oamasteaddji muitala maiddái, ahte dán dilis kundarat sáhttet maiddái diŋgot dálkasiid ruoktot.

– Maiddái telefovnnain sáhttá diŋgot. Mii sáhttit doaimmahit pakeahtaid Matkahuolto-fitnodaga bokte bálvalančuoggáide ja doppe vaikko lagas olbmot sáhttet viežžat daid, muitala Ropponen.

Varrasamosat

Muualla Yle.fi:ssä