Sápmi |

Davvin leat goddán spiehkastatlobiiguin guhtta gumppe – Dál lobit leat fámus Anáris, Savukoskis ja Sallas

Dán dálvvi gumppet leat speadjan máŋggaidlogiid bohccuid miehtá Sámi ja davimus Suoma.

Ammuttu susi ja verta hangella.
Govas gumpe, mii leat goddojuvvon spiehkastatlobiin Nuorta-Suomas. Govva: Pertti Huotari / Yle

Lappi eanangottis leat dán dálvvi goddán spiehkastatlobiiguin guhtta gumppe, mat leat dagahan stuorra ruđalaš dáhpágiid badjeolbmuide. Gumppiid leat goddán Avvila, Sattasniemi ja Kyrö bálgosiid guovllus.

– Avvila bálgosa guovllus leat goddán oktiibuot njeallje gumppe ja Kyrö ja Sattasniemi bálgosiin fas goappásge ovtta gumppe, dadjá Suoma fuođđoguovddáža Lappi fuođđohoavda Sami Tossavainen.

Sami Tossavainen dadjá, ahte Suoma fuođđoguovddáš lea mieđihan spiehkastatlobiid, go gumppet leat dagahan mearkkašahtti stuorra boazovahágiid dáin guovlluin.

Suoma fuođđoguovddáš lea addán álgodálvvi oktiibuot 10 spiehkastatlobi gumppiid goddimii. Spiehkastatlobiid mieđiheamis leat čuvvon dárkilit láhkaásaheami, dadjá fuođđohoavda Tossavainen.

– Lobiid leat mieđihan meahcástuslága vuođul ja earenoamážit dan čuoggá vuođul, mas bohtet ovdan earenoamáš mearkkašahtti vahágat.

– Juohke geardde go mearrádus dahkkojuvvo, de dalle guorahallat dárkilit, ahte man ollu guđege guovllus gumpevahágat leat leamaš ja man áiggi siste. Jus leat dušše moadde vahága, de dat ii vealtameahttumit leat lobi mieđiheami ágga, čilge Tossavainen goddinlobiid mieđihanpolitihka.

Badjeolbmuid mielde gumppet dagahan máŋggalogi duháha euro vahágiid

Gumppet leat speadjan bohccuid sámi bálgosiid lassin maid Savukoskis, Sallas ja Gihttelis.

Badjeolbmuid mielde gumppet leat dagahan máŋggalogi duháha euro ovddas vahágiid Avvila, Sállevári, Lappi, Giema-Soabbat, Kuivasalmi ja Sattasniemi bálgosiin.

Boazovahágiid mearri boahtá ovdan ohcamušain, maiguin bálgosat leat ohcan spiehkastatlobiid gumppiid goddimii. Bálgosiid almmuhan dieđut čilget maiddái Suoma fuođđoguovddáža lohpemearrádusain, mat gávdnojit dáppe.

Stuorimus vahágiid gumppet leat dagahan nuortarájá alde Salla, Lappi ja Giema-Soabbat bálgosiin. Dán čavčča Salla bálgosis leat gávdnan 26 ráppi gumppiid maŋis. Nubbin eanemus gumppe goddin bohccuid leat gávdnan Giema-Soabbat bálgosis, gos gumppet leat goddán 17 bohcco. Lappi bálgosis gumppiid goddin bohccuid leat gávdnan 13. Dáid gumpevahágiid leat badjeolbmot dárkkistan ovttas gielddaid eanandoallodoaimmahaguin.

Dál fámus golmma gumpii goddinlohpi

Suoma fuođđoguovddáš lea mieđihan maŋimuš spiekastatlobiid gumppiid goddimii juovllaid maŋŋá. Dál leat fámus golmma guovllus spiehkastatlobit, maid olis badjeolbmot sáhttet goddit gumppiid, mat dagahit boazodollui mearkkašahtti vahágiid.

Spiehkastatlobit leat fámus Sállevári, Giema-Soabbat ja Salla bálgosiin. Guđege guovllus ožžot goddit ovtta gumppe. Spiehkastatlobiid olis bivdit ožžot maiddái geavahit mohtorfievrruid ja čuovgga.

Spiehkastatlobiin Giema-Soabbat lohpi bistá ođđajagimánu 7. beaivvi rádjái. Sállevári bálgosa badjeolbmuide mieđihuvvon lohpi bistá ođđajagimánu 9. beavvi rádjái ja Salla lohpi fas ođđajagimánu 18. beaivvi rádjái.

Varrasamosat: Sápmi

Váldoođđasat

Varrasamosat

Muualla Yle.fi:ssä