Sápmi |

Davvin leat vahku siste goddán guokte gumppe spiehkastatlobiin – gumppet leamašan dán čavčča valjis máttimus bálgosiin

Dán čavčča leat boazodoalloguovllus goddán fargga seamma olu gumppiid go mannan bivdojagi oktiibuot.

Susi
Davvin leat dán čavčča goddán spiehkastatlobiin oktiibuot golbma gumppe. Govva: Ismo Pekkarinen / AOP

Davvin leat goddán vahku siste guokte gumppe spiehkastatlobiin. Maŋŋebárgga 12.11. gumppe godde Lappi bálgosa guovllus Soađegili gielddas ja mannan bearjadaga 8.11. fas Kuivasalmi bálgosa guovllus Gihttela gielddas, lahka Sállevári bálgosa rájá.

Davvin leat dán čavčča goddán spiehkastatlobiin oktiibuot golbma gumppe. Vuosttas gumppe godde árat dán čavčča Savukoskis.

Lappi fuođđoguovddážis muitalit, ahte dán čavčča olles boazodoalloguovllus leat spiehkastatlobiin goddán jo olles ovcci gumppe. Mannan bivdobajis godde oktiibuot 12 gumppe, main logis ledje Lappi eanangotti bealde. Bivdobadji álgá álo borgemánu álggus ja nohká čuovvovaš suoidnemánus.

Dán čavčča gumppet leamašan valjis jođus máttimus bálgosiin. Kainuu guovllus leat goddán njeallje gumppe ja Oulu guovllus guokte.

Fuođđoguovddáš mieđiha spiehkastatlobiid gumppiid dagahan vahágiid vuođul. Spiriid spiehkastatlobit almmustahttojuvvojit Fuođđoguovddáža neahttasiiddus.

Dál davvin eai leat šat fámus spiehkastatlobit gumppiide.

Varrasamosat: Sápmi

Váldoođđasat

Varrasamosat

Muualla Yle.fi:ssä