Sámepolitihkka |

Davviriikalaš sámesoahpamuš guovddážis Sámedikki ja vuođđolahkaváljagotti čoahkkimis

Vuođđolahkaváljagotti ja Sámedikki oktasaš deaivvadeamis oktan dehálamos fáddán loktanii davviriikalaš sámesoahpamuš, man ráđđádallamiid Suopma dál jođiha. Ságadoalli Tiina Sanila-Aikio mielas dál leage dehalaš čalmmustahtit davviriikalaš sámesoahpamuša.

Sámedikkis lei deaivvadeapmi vuođđolahkaváljagottiin 26.4.2016.
Vuođđolahkaváljagoddi deaivvai ikte maŋŋebárgga maiddái Sámedikki ovdal álbmotdilálašvuođa. Govva: Liisa Holmberg

Vuođđolahkaváljagoddi deaivvai ikte maŋŋebárgga maiddái Sámedikki ovdal álbmotdilálašvuođa.

Sámedikki deaivvadeamis oktan dehálamos fáddán loktanii davviriikalaš sámesoahpamuš, man ráđđádallamiid Suopma dál jođiha.

Sámedikki ságadoalli Tiina Sanila-Aikio sávvá ovttasbarggu váljagottiin, vai beasašedje ovddosguvlui davviriikalaš sámesoahpamušain, mii galggašii leat gárvvis jagis 2017.

– Hálesteimmet eanemusat davviriikalaš sámesoahpamuša birra, muhto dat dieđusge guoská meastá juohke ealáhusa ja sámeáššit gusket viidát máŋgga áššái. Viidát beasaimet hálestit sámeáššiid birra ja hálesteimmet, ahte makkár váikkuhusat konkrehtalaš dásis davviriikalaš sámesoahpamušas leat min álbmogii. Vehá manai badjel áigi maiddái, muitala Sanila-Aikio.

Tiina Sanila-Aikio
Govva: Pirita Näkkäläjärvi / Yle

Dehálaš muitalit soahpamuša dehálašvuođa birra

Davviriikalaš sámesoahpamuš ja ILO 169 -soahpamuš ledje váldosivat vuođđoláhkaváljagotti reaisui Anárii.

Tiina Sanila-Aikio mielas dál leage dehalaš čalmmustahtit davviriikalaš sámesoahpamuša.

– Dán soahpamuša ráđđádallamat leat vel gaskan, nu dál ferte muitalit dán dehálašvuođa birra ja dan mo dat dahka álkibun dán ovttasbarggu, man mii bargat olu sápmelaččaid gaskas. Go Sámis leat golbma riikka, nu das lea stuorra mearkkašupmi. Ja dál vuođđolahkaváljagotti lahttut besse duođastit, ahte dat lea duođai dehálaš soahpamuš.

Davviriikalaš sámesoahpamuš sáhttá leat joba buoret go ILO-soahpamuš, dadjá Tiina Sanila-Aikio.

– Ja jos dat duođai lea buorre bargoneavvu, dát sáhtášii leat juoba buoret go ILO-soahpamuš. Dát sáhtášii leat buorre ovdamearkka eará unnit logu joavkkuide, nugo álgoálbmogiidda, geat orrut miehtá máilmmi. Máŋgasat leat juo vuordimen bohtosiid, go dat ságastallan lea jorran juo 11 jagi, lasiha Sanila-Aikio.

Lapinties alla vuordámušat davviriikalaš sámesoahpamuššii

Vuođđoláhkaváljagotti ságadoalli Annika Lapintie (vas) vuordá davviriikalaš sámesoahpamušas ođđa bargoneavvu, mii sáhttá leat maid veahkkin čoavdimin sápmelašgiccu.

– Davviriikalaš sámesoahpamuš orru leamen dakkár, ahte jos dat ovdánivčče, nu jáhkán ahte das sihkkarit sáhtášii oažžut buorrege doarjaga dáid váttisvuođaid čoavdimii, Lapintie dadjá.

Annika Lapintie
Govva: Pirita Näkkäläjärvi / Yle
ILO 169 -soahpamuša son kommentere dan meare, ahte ratifiseremis sáhttá leat váikkuhus joba ođđa meahciráđđehusláhkii.

– Aŋkke máŋga áššedovdi dadje, ahte jos, jos ja go, dát ILO 169 dohkkehuvvo, nu dalle gártet oalle sihkkarit rahpat maid dan oalle varas meahciráđđehuslága, Lapintie dadjá.

Varrasamosat: Sámepolitihkka

Váldoođđasat

Varrasamosat

Muualla Yle.fi:ssä