Sápmi |

Davviriikalaš sámesoahpamušbargu oažžumin fas fártta – riekteministtar Henriksson: ”Min dáhttu lea, ahte boahtte čavčča beasašeimmet dohkkehit dan”

Suoma, Ruoŧa ja Norgga sámeáššiid ministarat ja Sámedikkiid njunnošat ságastalle dán vahkus sámesoahpamuša ovddideamis.

Anna-Maja Henriksson
Suoma riekteministtar Anna-Maja Henriksson dadjá, ahte ulbmilin lea oažžut sámesoahpamuša boahtte jagi áigge dakkár hápmái, ahte buohkat basttet dohkkehit dan. Govva: Riekteministeriija

Davviriikalaš sámesoahpamuša dohkkeheapmi lea fas ožžon veháš biekka borjasiidda.

Árat dán čavčča muitaluvvui, ahte bargu lea oalát orustan. Sivvan barggu bisáneapmái lei dat, go Suoma, Norgga ja Ruoŧa Sámedikkit háliidit rievdadit osiid soahpamušteavsttas, muhto Norgga ráđđehus fas ii hálit šiehtadallat áššis ođđasit.

Suoma, Ruoŧa ja Norgga sámeáššiid ministariid ja Sámedikkiid njunnošiid jahkásaš deaivvadeamis dán vahkus goit ságastalle sámesoahpamuša ovddideamis buori vuoiŋŋas.

Henrikssona mielde oktasaš dáhttun soahpamuš boahtte čavčča

Suoma riekteministtar Anna-Maja Henriksson dadjá, ahte oassebeliid ulbmilin lea oažžut sámesoahpamuša boahtte jagi áigge dakkár hápmái, ahte buohkat basttet dohkkehit dan.

– Min buohkaid dáhttu čoahkkima maŋŋá lea dat, ahte boahtte čavčča mis livččii soahpamuš, man buot riikkat ja sámedikkit basttet dohkkehit, dadjá Henriksson.

Henrikssona mielde deaivvadeamis leat ságastallan dan vejolašvuođas, ahte soahpamuššii livččii vejolaš dahkat muhtin teknihkalaš rievdadusaid.

– Ruoŧŧa bovde čuovvovaččat buot oassebeliid seamma beavdái ja de soahpamuša gárven joatkašuvvá. Buorre ášši lei dat, ahte Norga lei maiddái dan oaivilis, ahte dát heive sidjiide ja ná mii ovdánit, čilge Henriksson.

Juuso: ”Geahččalit čájehit rabasvuođa”

Sámedikkit háliidivčče rievdadit sámesoahpamušas oktiibuot njealje sierra čuoggá. Okta dáin guoská sápmelašmeroštallama.

Suoma sámedikki ságadoalli ja sámi parlamentáralaš ráđi jođiheaddji Tuomas Aslak Juuso mieđiha, ahte dilli lea moalkái ja áššit váddásat.

– Buot sámedikkit leat gáibidan rievdadusaid. Mii eallit vehá ođđalágan dilis, dasgo olmmošvuoigatvuohtaáššit leat maiddái ovdánan ja dan ferte váldit vuhtii davviriikalaš sámesoahpamušas, oaivvilda Juuso.

Tuomas Aslak Juuso
Suoma sámedikki ságadoalli ja sámi parlamentáralaš ráđi jođiheaddji Tuomas Aslak Juuso sávvá, ahte sámedikkit ja riikkat besset ovttaoaivilvuhtii sámesoahpamušas. Govva: Vesa Toppari / Yle

Juuso mielde sámedikkiin lea goit hállu joatkkit sámesoahpamušbarggu.

– Mii leat sámedikki bealis geahččalan čájehit rabasvuođa, ahte mis lea hállu ja dáhttodilli ovttasbargat viidáset áššiin ja gávdnat čovdosiid vai mii basttášeimmet lagaš áiggiid vel oažžut bohtosa áigái, dadjá Juuso.

Varrasamosat: Sápmi

Váldoođđasat

Varrasamosat

Muualla Yle.fi:ssä