Sápmi |

Davviriikkaid ráđi bálkkašumit almmustahttojuvvojit gáiddusdilálašvuođas – guokte sámi girjji evttohassan girjjálašvuođabálkkašupmái

Girjjálašvuođabálkkašumi evttohassan lea Niillas Holmberg ja nuoraid- ja mánáidgirjjálašvuođa bálkkašumis gilvaleaba Karen Anne Buljo ja Inga-Wiktoria Påve.

Niillas Holmberg
Niillas Holmber diktagirji Juolgevuođđu gilvala girjjálašvuođabálkkašumis. Govva: Kirsti Länsman / Yle

Davviriikkaid ráđi bálkkašumit juhkkojuvvojit odne maŋŋebárgga 27.10. erenoamáš sáddaga bokte, mii lea oaidnin láhkai miehtá Davviriikkaid.

Koronadili dihte bálkkašumiid juohkindilálašvuođa eai sáhte ordnet Islánddas, mas lea guoimmuhanvuorru dán jagi.

Viđa bálkkašumis gilvalit oktiibuot 51 barggu, álgaga ja dáiddára. Daid joavkkus leat románat, noveallat, diktačoakkáldagat, drámát, dokumentárafilbma, pop-skearru, filbmamusihkka ja sinfoniijat sihke mieđašeatnedikšu ja dálkkádatdutki. Viđa vuoitái juhkkojuvvo Nordlys-bálkkašupmebázzi ja 350 000 Dánmárkku ruvnnu, mii lea sullii 47 000 euro.

Dávviriikkaid ráđi ruhtabálkkašumiid evttohassan leat maiddái sápmelaš dáiddárat ja girječállit. Girjjálašvuođabálkkašumi evttohassan Sámis lea diktačálli ja musihkkár Niillas Holmberg diktačoakkáldagainis Juolgevuođđu (2018). Nuppi kategoriijas nuoraid- ja mánáidgirjjálašvuođa bálkkašumi evttohassan lea girječálli Karen Anne Buljo ja dáiddár Inga-Wiktoria Påve govvagirji Guovssu guovssahasat (2019). Påve lea maiddái ráhkadan govaid Holmberg diktačoakkáldahkii.

– Dát áidnalunddot dáiddárat ja doaibmit leat erenoamáš dehálaččat áiggis, goas kultuvra ja dálkkádat ságastahttet min buohkaid, lohká Davviriikkaid ráđi presideanta Silja Dögg Gunnarsdóttir Davviriikkaid ráđi neahttasiiddus.

Dilálašvuohta álgá odne maŋŋebárgga diibmu 22.10 Suoma áiggis ja liŋkka gávnnat dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä