Sápmi |

Davviriikkalaš sámesoahpamuša dohkkeheapmi bisánan – sámedikkit háliidit divodit soahpamuša

Sámi parlamentáralašráđđi lea evttohan Davviriikkaide joatkkaráđđádallamiid divvunevttohusain.

Saamelaiskäräjien puheenjohtaja Tuomas Aslak Juuso
Sámi parlamentáralašráđi njunuš Tuomas Aslak Juuso muitala, ahte leat oktiibuot njealje čuoggá maid sámedikkit háliidit rievdadit sámesoahpamušas. Govva: Tuomas Hautaniemi / Yle

Davviriikalaš sámesoahpamuša dohkkeheapmi lea oalát orustan. Stáhtat ja sámedikkit eai leat ovtta oaivilis das, mo galgá meroštallat gii dohkke sápmelažžan, čállá NRK Sápmi neahttasiidduinis.

Suoma, Norgga ja Ruoŧa sámedikkit leat dáhtton rievdadit oasi čilgehusas jienastuslogu birra. Norgga sámeministtar Linda Hofstad Helleland lea vástidan Norgga Sámediggái, ahte stuorit rievdadusat teavsttas gáibidit lassebarggu ja ođđa ráđđádallamiid. Norgga ráđđehus ii goit hálit ođđasit šiehtadallat áššis. Helleland deattuha, ahte smávit rievdadeamit gal dohkkehuvvojit.

– Jus ođđasit galggaš šiehtadallat, de dat maŋida soahpamuša vel eambbo, čállá Helleland reivvestis Norgga Sámediggái.

SPR sávvá joatkkaráđđádallamiid

Suopma, Norga ja Ruoŧŧa leat bargan davviriikkalaš sámesoahpamušain jo jagis 2002. Vuosttas evttohus gárvvásmuvai jagis 2005. Vaikko davviriikkalaš bargojoavku oaččui jagis 2017 áigái soahpamuševttohusa, de eai leat riikkaid sámedikkit dohkkehan dan.

Sámi parlamentáralašráđi njunuš Tuomas Aslak Juuso čilge, ahte leat oktiibuot njeallje čuoggá maid Sámedikkit háliidit rievdadit sámesoahpamušas. Okta dáin guoská sápmelašmeroštallama.

– Dat maid Sámi parlamentáralašráđđi lea cuiggodan, lea oassi álgosártnis, mii guoská meroštallamii. Das vehá eahpečielgasit daddjo, ahte stáhtain livččii sámedikkiid lassin riekti vel dohkkehit olbmuid jienastusloguide. Mii leat oaivvildan beare rievdadit dan nu, ahte lea čielggas, ahte álgoálbmogiid vuoigatvuođat leat sihkkarastojuvvon maiddái dán konvenšuvnna sisdoalus, čilge Juuso.

Tuomas Aslak Juuso muitala, ahte SPR lea evttohan davviriikkaide joatkkaráđđádallamiid divvunevttohusain.

– Dát rievdadusat soitet leat oalle teknihkalaččat. Mun sávan, ahte mis lea vel vejolašvuohta joatkkit dáinna áššiin. Nu ahte dát davviriikalaš sámesoahpamuš livččii dien hámát, ahte SPR sáhtášii duhtat dillái, dadjá Juuso.

Varrasamosat: Sápmi

Váldoođđasat

Varrasamosat

Muualla Yle.fi:ssä