Sápmi |

Davvisámegiela oahpaheaddji  Ellen Pautamo ja lullisámegiela áššedovdi Jonar Thomasson oažžuba dán jagáš Gollegiella-bálkkašumi

Ellen Pautamo ja Jonar Thomassona áŋgiris giellabargu bálkkašuvvui davviriikkalaš giellabálkkašumiin gaskavahkko Helssegis.

Ellen Pautamo ja Jonar Thomasson
Ellen Pautamo ja Jonar Thomasson juohkiba Gollegiella-bálkkašumi dán jagi. Govva: Ellen Pautamo govva: Linda Tammela / Yle. Jonar Thomasson: Priváhta

Dán jagáš Gollegiella-bálkkašumi oažžuba Ellen Pautamo Tamperes ja Jonar Thomasson Limingenis.

Pautamo lea bargan guhká davvisámegiela oahpaheaddjin ja Thomasson fas lea áŋgiruššan lullisámegiela ovdii.

Suoma riekteministtar Anna-Maja Henriksson almmustahtii bálkkašumi oažžuid odne Helssegis, Norgga, Ruoŧa ja Suoma sámeáššiid ministariid ja sámedikkiid ságadolliid čoahkkima oktavuođas.

– Liegga giitosat goappašagaide mearkkašahtti barggus sámegielaid ovdii. Sávan, ahte Pautamo ja Thomassona bargu oažžu min beroštuvvat sámegielain ja kultuvrras ja atnit dáid maiddái árvvus, dadjá riekteministtar Anna-Maja Henriksson.

Pautamo: "Dát lea áibbas issoras"

Ergon Máreha Ánne Elle-Máret, Ellen Pautamo lea álgoálggus Eanodagas eret. Pautamo lea bargan guhká sámegiela oahpaheaddjin ja lea barggustis ovddidan earenomážit sámi gáiddusoahpahusa.

Pautamo bargá Sámi oahpahusguovddážis virtuálaskuvllas sámegiela ja kultuvrra lektorin. Son doaibmá maiddái oahpaheaddjiid skuvlejeaddjin.

Pautamo lei boahtán Helssegii báikki ala vuostáiváldit bálkkašumi. Son ii meine gávdnat sániid, go lea nu ilus ja giitevaš giellabálkkašumis.

– Galhan dát lea áibbas issoras. Dieđusge mun lean hui ilus ja ferte leat giitevaš, ahte dat olbmot leat oaidnán dan mu barggu nu dehálažžan, ahte mun lean ožžon dákkár gudnebálkkašumi, dadjá Pautamo.

Gollegiella-bálkkašumi oažžun njuolgut njuorasmahttá sámegiela oahpaheaddji.

– Dieđusge das lea hirbmat stuorra mearkkašupmi, go dathan lea stuorimus man sáhttá oažžut sámegielas. In goassege vuordán, ahte mun oaččun dán, dadjá Pautamo.

Ellen Pautamo Gollegiella
Suoma riekteministtar Anna-Maja Henriksson geigii bálkkašumi Ellen Pautamoi odne Helssegis. Govva: Riekteministeriija

Thomasson ii lean vuordán bálkkašumi

73-jahkásaš Jonar Thomasson lea eret Lyjmedes (dg. Limingen), Norgga bealde, muhto son lea riegádan Ruoŧa bealde Vualtjeres. Son lea bivnnuhis giellagáldu iežas servodagas ja gaskkusta sámegiela ja sámi kultuvrra sihke historjjá vásáhusaid.

Thomasson lea ovddidan sámegiela seailuma ja ovddideami dokumenteremiin lullisámegiela. Son lea čoaggán Mojhtsijstie-girjásis muitalusaid, sániid já sátnevádjasiid lullisámegillii.

Jonar Thomasson ii lean koronadili geažil vuolgán mátkkoštit Helssegii, muhto ávvuda bálkkašumi ruovttustis. Son ii lean vuordán dahje oba jurddašange, ahte oaččošii makkárge giellabálkkašumi.

– Dieđusge lean hui ilus, go dáthan lea stuorra bálkkašupmi, dadjá Thomasson.

Gollegiella-vuoiti jáhkká, ahte maid su lagamuš ustibat ja bearaš addet árvvu bálkkašupmái.

– Sii leat oaidnán man olu lean bidjan áiggi ja fámuid sámegillii. Lean hui giitevaš dán bálkkašumis, dadjá Thomasson.

Gollegiella juhkkojuvvo guovtti jagi gaskkaid

Gollegiella-bálkkašupmi juhkkojuvvo ovttaskas olbmui dahje servošii Norggas, Suomas, Ruoŧas dahje Ruoššas.

Bálkkašupmi lea 15 000 euro sturrosaš. Dán jagi bálkkašumi oažžut leaba guovttis, nu ahte bálkkašupmi juhkkojuvvo Pautamo ja Thomassona gaskkas.

Gollegiella-bálkkašupmi juhkkojuvvo dál ovccát geardde. Čuovvovaš háve bálkkašumi juhket jagis 2022.

Varrasamosat: Sápmi

Váldoođđasat

Varrasamosat

Muualla Yle.fi:ssä