Sápmi |

Davvisámegielat Mumenleahki oidnogoahtá cuoŋománus Yle Areenas – ráidu dubbejuvvo dušše davvisámegillii

Ráidu ii dubbejuvvo anáraš- ja nuortalašgillii, go eai gávdno doarvái jietnaneavttárat.

Muumilaakson väki uudessa animaatiosarjassa.
Govva: Moomin Characters & Gutsy Animations

Davvisámegielat Mumenleahki-prográmma oidnogoahtá boahtte giđa Yle Areenas. Mumenleahki-ráidu ihtá Yle Areenai cuoŋománus 2020. Yle ii leat goit vel almmuhan dan, goas davvisámegielat Mumenleahki sáddejuvvo TV:s.

Buvttadeapmi lea maŋŋonan, dasgo árat dán jagi almmuhuvvui, ahte sámegielat prográmma almmustahttojuvvo Yle Areenas jagi 2019 loahpas.

Álgoplánain lei, ahte Mumenleagi sámegielat jietnaveršuvnnain váldojuvvojit vuhtii buot Suoma golbma sámegiela, davvisáme-, anáraš- ja nuortalašgiella. Prográmma dahkama sámegillii lei evttohan Sámediggi. Dál lea goit sihkkarastojuvvon, ahte ráidu dubbejuvvo dušše davvisámegillii ja tekstejuvvo anáraš- ja nuortalašgillii. Yle almmustahttimiid hoavda Ismo Silvo dadjá, ahte dat lea resursagažaldat.

– Dubbemii ferte gávdnat olu eatnigielat jietnaneavttáriid inge jáhke, ahte dat gávdnojit beare jođánit golmma sámegillii. Lea goit buorre, ahte ráidu dahkkojuvvo juobe davvisámegillii, dadjá Silvo.

Vaikko anáraš- ja nuortalašgielat mánát eai beasage geahččat mumeniid iežas eatnigillii, de Silvo mielas lea buorre, ahte prográmma tekstejuvvo.

– Sávvamis vánhemat sáhttet lohkat mánáide daid teavsttaid. Leahan dat buorre álgu datge, ahte prográmmas leat eatnigielat teavsttat, dadjá Silvo.

Muumipeikko ja niiskuneiti istuvat vaaleanpunaisen pilven päällä yläilmoissa.
Govva: Moomin Characters & Gutsy Animations

Ii leat vel diehtu bagadallis – dál ohcet jietnaneavttáriid

Yle čájehii árat dán jagi Mumenleahki-animašuvnna ođđa veršuvnnas vuosttaš buvttadanáigodaga. Ráidu lea máksán badjel 20 miljovnna euro ja dat leage stuorámus ja divraseamos TV-buvttadeapmi Suomas.

Mumenleahki-prográmma buvttadeamis vástidit suopmelaš Gutsy Animations -fitnodat ja prográmma dáiddalaš bagadalli Marika Makaroff.

Gutsy Animations -fitnodaga ovddidanhoavda Reetta Ranta muitala, ahte ii leat vel mearriduvvon, gii bagadallá dahje jorgala davvisámegielat Mumenleahki-ráiddu. Fitnodat lea goit olles leavttuin ohcame jietnaneavttáriid.

– Mis lea guhkes listu davvisámegielat jietnaneavttárat. Báddemat čađahuvvojit guovva-njukčamánus, muitala Ranta.

Jietnaneavttáriid davvisámegielat Mumenleahkái válljejit Yle, Gutsy Animations, Moomin Characters ja BTI-jorgalanfitnodat ovttas.

Sámegillii dubbejuvvon animašuvnnat leat unnán ja danne Yle illudage, go beassá čájehit Mumenleahki-ráiddu davvisámegillii.

– Lea fiinna ášši, ahte mii bastit muitalit sámegillii máidnasa, man olles máilbmi dovdá. Mii leat čeavlái das, dadjá Yle almmustahttimiid hoavda Ismo Silvo.

Varrasamosat: Sápmi

Váldoođđasat

Varrasamosat

Muualla Yle.fi:ssä