Sápmi |

Deanu gielddapolitihkkár ballá Suoma beale hoteallaid nuoskidit Deanu – Ohcejoga gielddahoavda: "Suomas lea hui čavga birasláhka"

Deanu gieldda várresátnejođiheaddji Odd Erik Solbakk áigu dáhtut Norgga ja Suoma rádjačázádatkommišuvnna dutkat ášši.

Odd Erik Solbakk
Odd Erik Solbakk lea fuolas das, mo Suoma beale hoteallat váikkuhit Detnui ja Deanu birrasii. Govva: Eilif Aslaksen / NRK

Deanu gieldda várresátnejođiheaddji Odd Erik Solbakk lea fuolas das, mo ođđa hoteallaid huksen váikkuha Detnui ja luosaide. Son ballá Suoma láhka divttášii hoteallaid nuoskidit Deanu birrasa.

Son áigu dáhtut Norgga ja Suoma rádjačázádatkommišuvnna dutkat ja čilget, makkár njuolggadusat ja lágat Suoma bealde leat. Solbakk muitala áššis NRK Sámi jearahallamis, jearahallama sáhttá guldalit davviriikalaš Buorre Iđit Sápmi -sáddagis.

– Eathan mii dieđe, mo doppe Suoma bealde meannudit lágain. Mas mii diehtit, sáhttet guččaid ja baikkaid luoitit njuolgga Detnui, lohká son. Ohcejogas leat golbma hotealla láhkalagaid, ja mo dat meannudit lužain ja baikkain? Dan eat dieđe, dadjá Solbakk.

Son ii vuostálasttáše ođđa hoteallaid huksema Norgga beallai Deanu šaldái, go su mielde Norgga láhka dorvvasta birrasa buhtisin seailuma.

– Mis dáppe Dáža bealde leat garra njuolggadusat. Mii leat aiddo geavahan 20 miljovnna ruvnnu buhtistanrusttega divvumii, mii lea dáppe Deanu šaldis, Solbakk dadjá.

Ohcejogas eai leat fuolas – Gielda stivre turismafitnodagaidis ohcat birassertifikáhtaid

Ohcejohkalaš luopmoguovddáža eaiggát Petteri Valle ja gieldda jođiheaddji Vuokko Tieva-Niittyvuopio mielde Norgga bealde eai dárbbaš bállat, ahte Suoma bealde nuoskidit birrasa ja čázádagaid. Tieva-Niittyvuopio muittuha, ahte Suomas lea hui čavga birasláhka, man čuvvot dárkilit.

– Mii váldit lága njuolggadusaid hui dárkilit vuhtii buotlágan huksemis ja lávvaplánain, muitala Tieva-Niittyvuopio.

Vuokko Tieva-Niittyvuopio
Ohcejoga gielddahoavda Vuokko Tieva-Niittyvuopio mielde Ohcejogas čuvvot Suoma biraslága dárkilit. Govva: Kaisa Aikio / Yle

Ohcejoga gielddas buot duolvačáhci manná sierra duolvačáhcái dárkkuhuvvon bohcciid mielde duolvačázi gieđahallanguovddážii.

– Mun ieš in leat gal ollenge fuolas. Ohcejoga girkosiida, gielda ja fitnodagat dáppe váldet dievas ovddasvástádusa. Dieđusge lea buorre, ahte birasáššiide giddejit fuomášumi, dat lea midjiide buohkaide dehálaš, dadjá Tieva-Niittyvuopio.

Fitnodatdoalli Petteri Valle lea ovttaoaivilis gieldda jođiheaddjiin.

– Midjiide lea hui dehálaš luonddu mielde eallit nu, mo mii sápmelaččat leat áli eallán dáppe, nuoskideapmi ii gula dasa, deattuha Valle.

Petteri Valle fuomášahttá maid, ahte dán áigge turisttat válljejit vásttolaš turismafitnodagaid. Sidjiide lea dehálaš diehtit, makkár ortnet fitnodagain lea.

Vuokko Tieva-Niittyvuopio muitala, ahte Ohcejoga gielda lea fárus vásttolaš turisma -fidnus. Fidnu olis gielda lea ožžon ruđa stivret turismasuorggi fitnodagaidis ohcat alcceset birassertifikáhta.

– Dat lea midjiide gudneášši, ahte min turismaealáhus lea vásttolaš, lohká Tieva-Niittyvuopio.

Varrasamosat: Sápmi

Váldoođđasat

Varrasamosat

Muualla Yle.fi:ssä