Sápmi |

Deanu jieŋat leat suddamin – áššedovdi árvala jieŋaid johttát geassemánu álggus

Ohcejohkalaš Ola Laiti lea jahkelogiid čuvvon Deanu golgama ja oaivvilda, ahte dán áiggis lea dáhpáhuvvan nuppástus jieŋaid johttámis.

Badje-Deatnu, Savvon
Savvon Badje-Deanus duorastaga 21.5.2020. Govva: Jouni Aikio / Yle

Deanu jieŋat leat suddamin, muhto dat eai leat vel beassan johtui.

Ohcejohkalaš Ola Laiti oaidná lássaráigge njuolga Deanu guvlui. Laiti árvala dál manná áigi ovdalgo jieŋat johttájit, jos ii jo čáhci lovtta.

– Dálhan eai gal jieŋat vuolgge, dieđusge dat suddá várra oassi. Dáppehan lea nu coahki, ahte jieŋat báhcet veallát gárguid ala. Máŋgasat leat árvalan, ahte vulget dál 23. beaivve, muhto eai dat gal dáidde dalle vuolgit.

Laiti orru Gárnjárggas, Vuolle-Deanus, ja lea jo buori 50 jagi čuvvon Deanu golgama. Son oaivvilda dán áiggis lea dáhpáhuvvan nuppástus jieŋaid johttámis.

– Dat leat ovddešáiggiid mannan miessemánu loahpas, bohte visot jogas oktanaga. Dán áigge dat suddá árrat ja maŋŋit jiekŋu.

Laiti muitala, ahte ovdal basttii gielkkáin vuodjit vel geassemánu álggus jieŋa badjel, muhto dán áigge ii oba jieŋoge albma láhkái.

– Ovdalhan jieŋui jo árrat. Dálhan lea muhtin jagiin leamaš rabas vel duoppe guovvamánu álggus. Dat lea nie muhttašuvvan dát johka, ii dat leat nugo ovdal.

Hydrologa jáhkká jieŋaid vuolgit geassemánu álggus

Birasguovddáža jođiheaddji hydrologa Bertel Vehviläinen muitala, ahte jieŋaid vuolgima einnostit golganeinnostusaid vuođul. Jieŋat vuolgigohtet, go golgamat sturrot garra fárttain.

Deanus álget easkka dál golgamat stuorrut. Einnostusa mielde golgamat stuorrugohtet moatti beaivve siste, son muitala.

– Kánske dalle geassemánu álggus jieŋat johttágohtet. Oaidnit mo geavvá, dadjá Vehviläinen.

Diibmá Deanus johttájedje jieŋat juo cuoŋománu bealde. Birasguovddáža diimmá dieđuid mielde Deanu jieŋat johttájit gaskamearálaččat miessemánu 2. beaivve.

Varrasamosat: Sápmi

Váldoođđasat

Varrasamosat

Muualla Yle.fi:ssä