Sápmi

Deanu lohpevuovdin ságastahttá vuot – báikegoddelaš oaivvilda duolmmahallan lohpevuovdimis olgobáikegoddelaš giddodatoamasteaddjiide

Johan Erik Valle
Guolástusturisma Deanu alde leamaš dehálaš dienas ohcejohkalaš Johan Erik Vallei. Govva: Kirsti Länsman / Yle

Báikegoddelaš giddodatoamasteaddji ii leat beassan oastit sierralobiid neahttagávppis nugo olgobáikegoddelaš giddodatoamasteaddjit.

Ohcejohkalaš Johan Erik "Eetu" Valle lea beahttašuvvan dán giđa Deanu lohpevuovdinortnegii. Valle muitala, ahte son ii leat báikegoddelažžan beassan oastit giddodatoamasteaddjiid sierralobiid neahttagávppis, muhto baicce gártan mannat fysalaččat oastit lobiid EBI-dárkkisteaddjiin.

Fárus galge leat iešguđetlágan báhpárat, guolásteaddji namma, guolástanáigi, riegadanáigi, sotu-dovddaldat, čujuhusat ja vuolláičállosat.

– Olgobáikegoddelaččat fas leat beassan neahttagávppis várret nu ahte eai leat dárbbašan daid dieđuid almmuhit. Sii leat ožžon várret beivviid ja vahkuid, ja easkka maŋŋá mearridit gii dalle guolásta, imaštallá Valle.

Guolástusturisma Deanu alde leamaš dehálaš dienas Vallei, muhto dál ii bastte várret lobiid iežas kundariidda nugo ovdal ja dat dovdo maid burssas.

– Juohke gease das lea dienas čoggon, geassi lea okta sesoŋŋaáigi munnje. Leahan dat váivi go virgeolbmuid mearrádusaid dihtii olbmot manahit dietnasa, morašta Valle.

Guldal Johan Erik Valle jearahallama dás Jietna: Susanna Guttorm / Yle

EBI-guovddáš: Lobit leat dárkkuhuvvon váldooasis olgobáikegoddelaš guolástusrivttiid hálddašeaddjiide

Mannan bearjadaga bohte Deanu lohpegávpái várrenláhkai olgobáikegoddelaš giddodateaiggádiid sierralobit. Guhká dat lobit eai goittot geargan guohpput neahttagávppis.

EBI-guovddáža vuossárgga dieđuid mielde fanaslobiid leat várren sullii 1 450 ja várrekeahttá leat dušše sullii 200 lobi. Gáddelobiin fas lea geavvan nuppegežiid, dain leat várrejuvvon dušše sullii 450 lobi ja várrekeahttá leat ain sullii 1 200 lobi.

Guolledoalloáššedovdi Kare Koivisto muitala, ahte olbmot leat jearahallan sis lobiid várremis oluge ja Ohcejoga bálvalanbáikkis leamaš hoahppu vástidit olbmuide.

– Dáid sierralobiin leat olbmot jearahallan ja váldán oktavuođa midjiide, muhto ferte muitit maid láhkaásaheaddji lea dárkkuhan, nappo dát lobit leat dárkkuhuvvon váldooasis olgobáikegoddelaš guolástusrivttiid hálddašeaddjiide, dadjá Koivisto.

Kare Koivisto
EBI-guovddáža guolledoalloáššedovdi Kare Koivisto mielde mannan bearjadaga várrenláhkai boahtán sierralobit leat dárkkuhuvvon olgobáikegoddelaš guolástusrivttiid hálddašeaddjiide. Govva: Vesa Toppari / Yle

Koivisto muitala, ahte báikegoddelaččaide leat iežas lobit, olgobáikegoddelaš giddodatoamasteaddjiide iežas ja turisttaide fas iežas lobit.

Guldal Kare Koivisto jearahallama dás Jietna: Susanna Guttorm / Yle

Ohcejoga guolástusoasusgotti ságadoalli: Ii atte buorre gova lohpevuovdimis

– Mohkás hommá, dadjá Ohcejoga guolástusoasusgotti ságadoalli Mika Aikio.

Aikio muitala, ahte sutnje leat ášši olis váldán oktavuođa. Son oaidná, ahte lohpevuovdimis eai leamaš albma rávvagat mo meannudit giddodatoamasteaddjiid lobiiguin ja rávvagat leat rievdan vel dánge vahkus. Aikio mielas dat ii atte buorre gova lohpevuovdimis, muhto oaivvilda dan goit leat vuoiggalaš.

– Dat leamaš bahča ášši, muhto leahan dat buorre ahte buot giddodatoamasteaddjit besset daid várret, árvala Aikio.

Ohcejoga girkosiidda guolástusgotti ságadoalli Mika Aikio
Ohcejoga guolástusoasusgotti ságadoalli Mika Aikio muitala, ahte olbmot leat váldán oktavuođa sutnje ášši olis. Govva: Vesa Toppari / Yle

Čoavddusin Aikio oaidná dan, ahte eiseváldit galggašedje ráhkadit álkkes rávvagiid ja dieđihit áššis albmaláhkai.

– Dathan dieđus barggaha maid lohpevuovdi jos láigosoahpamušat eai leat albmaláhkai devdojuvvon. Ii das leat eará ráđđi, oaivvilda Aikio.

Guldal Mika Aikio jearahallama dás Jietna: Susanna Guttorm / Yle

Varrasamosat

Muualla Yle.fi:ssä