Sápmi |

Deanu luossabivddu áigot ráddjet garragieđain boahtte geasi – Hakaste: "Unna ráddjehusat eai dáidde dán dillái veahkehit"

Eana- ja meahccedoalloministeriija mielde guolásteami ferte dál ráddjet, vai luossanálli fas ealáska.

Tenon kalastus.
Boahtte geasi eai soaitte leat nu olu fatnasat Deanu alde, jus luossabivddu ráddjejit garrasit. Govva: Vesa Toppari / Yle

Eana- ja meahccedoalloministeriija pláne garra ráddjemiid Deanu luossabivdui boahtte geassái.

Sivvan ráddjemiidda lea dat, ahte Deanu luossanálli lea dutkamušaid mielde unnon sakka maŋemuš jagiid. Skádjaseasandutkamušaid mielde Detnui gorgŋo diibmá gođđat dušše badjelaš 14 000 luosa ja dát lea beali unnit go jagis 2018.

Eana- ja meahccedoalloministeriija mielde guolásteami ferte dál ráddjet, vai luossanálli fas ealáska. Ráđđádalli virgealmmái Tapio Hakaste muitala, ahte ráddjehusain ii leat vel mearriduvvon, muhto dat gal bohtet.

– Guolásteami ferte geahpedit mealgadit. Unna ráddjehusat eai dáidde dán dillái veahkehit, dadjá Hakaste.

Hakaste ii vel dieđe, ahte gártetgo Deanu guolásteaddjit báhcit oalát gáddái boahtte geasi.

– Dan in vel máhte dadjat. Rievdadus lea goit dan veardde stuoris, ahte mii fertet doaibmat dál. Buot molssaeavttut leat rabas, dadjá Hakaste.

Tapio Hakaste
Eana- ja meahccedoalloministeriija ráđđádalli virgealmmái Tapio Hakaste muitala, ahte ráddjehusain ii leat vel mearriduvvon. Govva: Vesa Toppari / Yle

Gođđuluosat eai jovssa oalgejogaid

Suoma ja Norgga oktasaš dutkanjoavkku varas raportta mielde luosat leat unnán jo dalle, go dat máhccet riddoguovlluide. Dutkiid mielde deháleamos luossanáliin guolli ii reahkká bivddu várás, jus ulbmilin lea oažžut doarvái gođđuguliid oalgejogaide.

Go luossa goargŋu gođđubáikkiide Deanu oalgejogaide Kárášjohkii, Iešjohkii ja Anárjohkii, de dávjá badjel bealli guliin goddojuvvon, ovdal go dat ollejit gođđat.

Eana- ja meahccedoalloministtar Jari Leppä lea fuolas Deanu luosa dilis.

– Fámolaš luossanálit leat dehálaš oassi Deanu guovllu sámekultuvrras ja vuođđu mátkeealáhusa ja asttuáigge guolásteapmái. Mii fertet gávdnat čovdosiid dán dillái ovttas čáhceguovlluid hálddašeddjiiguin, báikkálaš guolásteddjiiguin ja fitnodatdolliiguin. Jus guollebivdu ráddjejuvvo, de dat ferte leat dásseveardásaš Suoma ja Norgga ja maiddái sierra guolástanjoavkkuid gaskka, dadjá Leppä.

Suopma deattuha, ahte luossanáliid ealáskahttima ferte ovddidit sihke jogas ja maiddái riddoguovlluin.

Ráđđádallamat ain gaskkan

Suoma ja Norgga gaskasaš ráđđádallamat boahtte geasi luossabivddus leat ain gaskkan. Riikkat ráđđádallet maiddái Deanu soahpamuša guolástannjuolggadusaid ođasmahttimis, mat bohtet fápmui jagis 2022 ja leat fámus čuovvovaš čieža jagi.

Ráđđádalli virgealmmái Tapio Hakaste mielde ođđa guolástannjuolggadusain ferte váldit vuhtii luossanáli ealáskahttima.

– Ulbmilin lea beassat dan dillái, ahte luossa goargŋu nu olu, ahte buot gođđusajit divvet. Dasto lea guolli man bivdit guhkkit áigái, dadjá Hakaste.

Eana- ja meahccedoalloministeriija ráđđádalli virgealmmái Tapio Hakaste muitala, ahte guolásteami ferte dál ráddjet, vai luossanálli fas ealáska. Jietna: Anni-Saara Paltto / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä