Sápmi |

Deanu luossabivdogildosis ledje mearkkašahtti váikkuhusat báikkálaš servošii – dutkanfidnu álgobohtosiin muitalit lasi gáiddusbargobájis

Mo luossabivdogielddus leat váikkuhan bivdiide ja Deanu servodaga eallimii? Luondduriggodatguovddáš doallá otne duorastaga gáiddusbargobaji, mas guorahallet dutkanbohtosiid bivdogildosa váikkuhusain.

Joni Saijets doaibmá LUOSSA-dutkanfitnu báikkalaš jearahallin.
Joni Saijets bargá LUOSSA-dutkanfidnu jearahallin. Juo álgobohtosiin leat gávnnahan mearkkašahtti váikkuhusaid Deanu čáhčegátti olbmuid eallimii. Govva: Anneli Lappalainen

LUOSSA-dutkanfidnu lea vássán geasi maŋŋá dutkan, makkár kultuvrralaš, sosiálalaš, ekonomalaš ja servodatlaš váikkuhusat Deanu luossabivdogildosis leamašan báikkálaš dásis.

Dutkanfidnu bargi, báikkálaš jearahalli Joni Saijets muitala, ahte sii leat guorahallan, mo gielddus lea váikkuhan nu dábálaš olbmuid eallimii, muhto maiddái guovllu fitnodagaide ja virgeolbmuide.

– Deatnu lea báikkálaččaid, namalassii čáhčegátti olbmuid iežas identitehta. Dál, go dat lea váldon eret, das leat olu váikkuhusat nu millii, mielladearvvašvuhtii ja fysalaččat juoba olbmuid borrandábiide juo, go eai leat beassan obanassiige borrat luosa. Das lea nu báhča dovdu šaddan das, muitala Joni Saijets.

Joni Saijets muitala LUOSSA-dutkanfidnu birra. Jietna: Jouni Aikio / Yle

Dutkanbargu joatkašuvvá ain boahtte jahkái

Suoma eana- ja vuovdedoalloministeriija lea diŋgon Luondduriggodatguovddážis dutkamuša Deanu bivdogildosiin ja dan váikkuhusain. Mannan gease Deanu guovllus ii lean lohpi bivdit ollenge luosa, mii váikkuhii olles Ohcejoga gieldda eallimii. Ovdal dan Deanu luossabivdu biepmai Ohcejoga guovllu fitnodagaid ja olbmuid.

Dutkamuš lea álgán čakčat ja joatkašuvvá vel boahtte jahkái. Vuolggasadji lea čielggadit, ahte mo gielddus lea váikkuhan servošii, Deanu čázadaga ja čáhcegátti olbmuide, muitala Joni Saijets.

– Leat dál álggus jearahallan nuppelohkái olbmo ja bohtet vel lasi jearahallamat.

Dutkanfitnu jođiha Juha Hiedanpää ja dutkanjoavkku eará lahttut leat Päivi Abernethy, Mikko Jokinen, Marja Knuuttila ja Joni Saijets.

LUOSSA-dutkanfidnu áigu otne duorastaga muitalit rabas online-bargobájis álgočavčča jearahallamiid bohtosiin.

– Bargobajis mii muitalit álgobohtosiin, muhto maiddái ságastallat das, ahte leatgo mii dutkit rivttes bálgáid alde, ahte leatgo mii ádden, maid olbmot oaivvildit, čilge Saijets.

Dutkanfidnu dilálašvuohta lea otne duorastaga diibmu 16.30–20.00. Dasa sáhttá searvat MIcrosoft Teams -liŋkka bokte.

Yle Ođđasiid Sámis ja Beaivvi ságaid sáhtát maid guldalit Yle Areenas.

Divvojuvvon 11.11.2021 diibmu 13:05: Dutkanfidnu lea jearahallan nuppelohkái olbmo, ii moaddelogi olbmo. Maiddái dutkanjoavkku lahtuid namat lasihuvvon.

Varrasamosat: Sápmi

Váldoođđasat

Varrasamosat

Muualla Yle.fi:ssä