Sápmi |

Deanu luossanáliid dikšunplána lea cealkinláhkai – plánas evttohuvvo earet eará dan dutkan, man olu hávga borrá luossaveajehiid

Plána lea lohkanláhkai sihke suoma- ja dárogillii.

Tenon lohenpoikanen.
Deanu luossaveajet. Govva: Pasi Peiponen / Yle

Suoma ja Norgga gárvvistan Deanu luossanáliid dikšunplána lea cealkinláhkái. Dikšunplána geavahuvvo guolásteami regulerema vuolggasadjin ja dan ulbmilin lea dorvvastit guollenáliid biologalaš máŋggahámatvuođa sihke náliid bistevaš geavaheami.

Dikšunplána laktása Deanu guolástansoahpamuša čađaheapmái earet eará go árvvoštallat luossanáliid geavaheami bistevašvuođa sihke dikšuma nuppástuhttindárbbuid Deanu guolástansoahpamuša mearrádusaid mielde.

Dikšunplána sisttisdoallá dieđu earet eará Deanu guolástusa guoskevaš Suoma ja Norgga láhkaásaheamis, guolástanhálddahusas sihke luossanáliid dikšuma čovdosiin. Dan lassin das gávdnojit dieđut guollenáliid dilis, ovdáneamis ja doaibmabidjoevttohusain iešguđet siidojogaid oasil. Plánas leat maiddái govviduvvon Deanu guolástansoahpamuša váikkuhusat iešguđet čanastatjoavkkuide.

Evttohusat guolástanrivttiide

Plánas máinnašit earet eará Suoma beale giddodateaiggádiid guolástanrivttiid, sullasaš ordnet ii leat anus Norgga bealde.

Dikšunplánas čállet mottiin cealkagiin maiddái sis, geat leat árbbolaččat nappo árbeeatnamiid bokte sis livčče guolástanvuoigatvuohta, jus sii ásašedje Ohcejogas. Máŋggat sis goit ásset eará sajis go Ohcejogas, eaige ná beasa oasálastit dahje oahppat Sámiid árbevirolaš bivddu.

Dikšunplánaevttohusas leat evttohan, ahte olgobáikegoddelaš guolástanrivttiid oamasteaddjiin dahjege árbbolaččain livččii vejolašvuohta oassálastit árbevirolaš bivdui báikkálaš guolástanrievtti oamasteaddji veahkkin, ovdamearkka dihte suhkkin.

Gieđahallá maid vierrošlájaid váikkuhusaid – miella dutkat man olu hávga borrá luossaveajehiid

Plánas ovdanbukto maiddái dat, makkár predašuvdna čuohcá Deanu čázádaga luossanáliide. Plánas árvvoštallojuvvo predašuvnna vejolaš váikkuhusat ja evttohuvvo maiddái doaibmabijut, maiguin geahpedit vierrošlájaid vahátlaš váikkuhusaid.

Plánas buktet ovdan dárbbu lasihit máhtu das, mo sierra beađut sáhttet váikkuhit luossanáliide. Ovdamearkka dihte hávgga buohta evttohuvvo pilohttafidnu, mas dutkat man stuorra oasi luossaveajehiin hávga bivdá, ja dan maŋŋá árvvoštallat doaibmabijuid hávgga strategiijalaš jávkadeapmin.

Deanu luossanáliid dikšunplána lea ulbmil nannet váldegoddealáš guollenáliid dikšunplánan, man galgá váldit vuhtii go gárvvistit ja bidjat fápmui guovllolaš geavahan- ja dikšunplánaid.

Eana- ja meahccedoalloministeriija nanne gárvvis plána.

Cealkit sáhttá lausuntopalvelu.fi -neahttasiiddus 15.9. rádjái.

Varrasamosat: Sápmi

Váldoođđasat

Varrasamosat

Muualla Yle.fi:ssä