Sápmi |

Deanu luossasálašmearri lea kiloin seamma stuoris go ovddit jagiin, vaikke skádjaseasándutkamušain luosaid mearri orru uhcit go ovdal

Dutki Panu Orell árvala, ahte dán gease leat goddán stuorra luosaid, ja danin kilomearri lea bisson seamman go ovddit jagiin.

Kaikuluotain Tenojoessa
Skádjaseásaniin dutke, galle luosa gorgŋo geassit Detnui, Govva: Panu Orell / Luke

Suoma beale Deanu ja Anárjoga luossaturisttaid luossasálaš lei váile 8000 kilo, mii lea sullii seamma go guovtti ovddit jagi, muitala Luondduriggodatguovddáš Luke dieđáhusastis. Luke skádjaseasándutkamušaid mielde Detnui eai gorgŋon seamma olu luosat go ovddit jagiin.

Luke dutki Panu Orell árvala, ahte goddon luosaid kilomearri lea bisson dássidin danin, go leat goddán stuorát luosaid.

– Vaikke goargŋunluosaid mearri bázii guovtti ovddit jagi unnibun, guolleturisttaid sálaš kiloid mielde bisui ovddit jagiid dásis danin, go geassit 2020 Detnui gorgŋo gorálaččat vehá eanet stuorra luosat, Orell muitala.

Oppalaččat Deanu guolleturisttaid sállašat leamašan jagiin 2017–2020 vuollegaččat, man sivvan lea bealistis ođđa guolástannjuolggadusat. Njuolggadus lea ráddjen guollebivddu garrasit, čállá Luke dieđáhusastis.

– Ođđa guolástannjuolggadusa atnui váldin deaivvai buori áigái, go almmá dan vel unnit oassi Detnui gorgŋon smávva luossamearis livččii beassan gođđanguovlluide.

Luke mielde sivva Deanu luossanáliid mannan jagiid heajos dillái ii leat áibbas čielggas, muhto sii árvalit, ahte mearra váikkuha dasa.

– Mearradiliid nuppástusat, earret eará liekkasvuohta, biepmu mearri, guolledávddat ja bivdu váikkuhit olu mearas máhccan luosaid mearrái ja dan bokte luossanáliid dillái, Orell dadjá.

Luke lea ovttasbarggus norgalaš dutkanjoavkkuin gárven raportta Deanu luossanáli birra, mii válmmašmuvvá loahppajagis. Raporta boahtá almmolašvuhtii juovlamánus.

Varrasamosat: Sápmi

Váldoođđasat

Varrasamosat

Muualla Yle.fi:ssä