Sápmi |

Deanu sálašmearit unni, muhto guolástuslobit leat goittotge vuvdon Suoma bealde measta buot

Deanu alde leat dán gease olu guolásteaddjit, muhto sálašmearri orru statistihkaid miel báhcimin oalle heittodin.

Tenon kalastus.
Statistihkaid mielde dán gease Deanu sálašmearit čuvvot diimmá meriid goittot dán rádjái. Govva: Vesa Toppari / Yle

Dán rádjái Deanu sálašmearri dán geasi oasil ii oro áktánas. Dánge geasis lea šaddamin heittot luossajahki, jáhkká Luondduriggodatguovddáža dutki Panu Orell.

– Dál lea jo suoidnemánnu ja luossalohkange lea čájehan, ahte unnán goargŋu luossa dán gease Detnui. Dakkár buorre bealli goittot leamaš, ahte stuorát luosat, badjel 7 kilosaččat, leat vehá eanet go ovddit jagiin, muitala Orell.

Statistihkaid mielde dán gease sálašmearit čuvvot diimmá meriid goittot dán rádjái. Deanu luossasálašmeriid sáhttá čuovvut neahtas, gosa čogget turistaguolásteaddjiid almmuhan luossasálašiid.

Buot guolásteaddjiid geatnegasvuohtan lea almmuhit sálašmeriid Luondduriggodatguovddáža čohkken registarii. Diibmá sullii 90 proseantta turistaguolásteaddjiin dagai sálašalmmuhusa.

Muhtimat sáhttet lihkkohit luosa, muhto stuorát luossamearit eai leat gal vuordimis, dadjá Orell.

– Galhan muhtin ovttaskas olbmot sihkkarit leat goddán buresge luosa, muhto ollisvuođa go geahččá ja veardida sierra čuovvundieđuid, de unnán lea luossa Deanus.

Jagi 2019 luossasálašmearri
Govva: Riikka Tähtinen / Yle

Jagi 2020 luossasálašmearri
Govva: Riikka Tähtinen / Yle

EBI-guovddáš: Guolástuslobit vuvdon Suoma bealde measta buot

Heittot sálašmearit eai goittot leat váikkuhan guollelobiid vuovdimiidda. Guolledoalloáššedovdi Kare Koivisto EBI-guovddážis muitala, ahte Suoma bealde leat vuovdán measta buot guolástuslobiid Detnui. Deanu guolástuslobiid neahttagávppis oidnujit vel muhtin ovttaskas gáddelobit vuovdimassii ja fanaslobit vehá eanebuš.

Norgga bealde dilli lea eará. Deanučázádaga guolástanhálddahusa ráđđeaddi Narve Johansen muitala Ávvir-aviisii, ahte dán jagi eai leat vuovdán seamma olu oaggunkoarttaid go diibmá.

– Báikkálaš guolásteaddjit ostet áigodatkoartta ja turisttat jándorkoartta. Suopmelaččat leat stuorámus kunddarjoavku jándorkoarttaid oastiin. Dál leat sullii 40 proseantta koarttain vuvdon 11 000 oaggunkoarttas, muitala Johansen.

Oktiibuot Suomas ja Norggas lea vuovdimassii 22 000 bivdojándora.

Varrasamosat: Sápmi

Váldoođđasat

Varrasamosat

Muualla Yle.fi:ssä